Далудихъ чубан галай ампади жанавурни кукIвардалда. Гьакъикъатдани гьакI я. США-дин куьлгедик квай, адан патай датIана вири жуьредин куьмекар (пул, яракьар, международный идарайра тереф хуьн…) агакьзавай Израилди, дуьньядин бязи уьлквейрин халкьарай наразивилин гьарай физ-физ, Палестинадин шегьерар, хуьрер кукIварна, аялрилай гатIунна, агъзурралди агьалияр тергна. Гила нубат США-дин кIиринай тефизвай Исламдин Ирандин республикадал атанва.
Дуьньядин ислягьвилин премия кIанзавай Дональд Трампа, ядерный программадин гьакъиндай Ирандихъ галаз икьрар кутIунзавайди я лугьуз, иранвияр алдатмишна ва 28-февралдиз, Израилни вилик кутуна, хабарсуз Исламдин республикадин шегьеррал цавай гьужумна. Ирандин Верховный регьбер Али Хаменеи, адан хизан ва гьукуматдин, командованидин кар алай къуллугъчияр телефна.
Анжах военный имаратар барбатIда лугьузвай Трампан ва Нетаньяхудин вири гафар таб акъатна. Ирандин рушарин школа яна, 170-дав агакьна жаван рушар терг авун Трампа дуьньяда ислягьвал туник кутазвай пай я жал? Са тахсирни квачир, аялар, дишегьлияр, яшлубур яшамиш жезвай кIвалер, дараматар ракетайрай ягъун, анрал гзаф залан бомбаяр вегьин, ислягьвилин мурадар аваз ийизвайди я жал? ЖаллатIар ракъурна, Венесуэладин президентдин резиденциядал гьужумун, Мадуро ва адан уьмуьрдин юлдаш кьуна США-диз тухун, уьлкведин нафтIадин иесивал авун ислягьвилин мурадралди авурди я жал? Лап акьалтIай вагьшивилиз рехъ гузва США-ди.
Ингье мад са тахсиркарвал. Ирандин нафтIадихъ галаз алакъалу заводар, базаяр, карханаяр, гьамбарханаяр ракетайрай яна, Тегерандин цав мичIи авунва. ЧIулав бипIинар куьчейрал, кIвалерал, машинрал ацукьзава. Гьава инсанар патал зиянлу хьанва. Им США-ди гьалдарнавай Израилди иранвийриз кьунвай гзаф чIуру, инсафсуз кар я. Израилдиз Ирандин республика михьиз барбатI ийиз, США-дихъ галаз санал адан девлетрин иесивал ийиз кIанзава. Абуру чпин алчах мурадрикай ачухдиз лугьунни ийизва. «Чаз кIандайвал тахьайтIа, чна Ирандал авурдалай къад сеферда гзаф гужлу гьужум ийида», — лугьузва Трампа.
Ягьсузвилин а кьил авач. Журналистрин вилик экъечIна, малумарзава: «Ирандиз чал гьужумиз кIанзавай. Гьавиляй чна гьафте виликамаз ам Верховный регьбердикай ва гзаф командиррикай магьрумна…»
Дуьньядин вилик икI тапарарзавай касдиз вич алемдин шагь хьиз ава. Вичиз муьтIуьгъ тахьайбурун гьахъ-дуванни авун ада вичин буржи яз гьисабзава. США-дин вилик пад кьадай Советрин Союз хьтин къудратлу государство амачирвиляй ингье гьа икI жезва. Социализмдин виликан уьлквеярни НАТО-дик кутун хъувурдалай гуьгъуьниз США-дин иштагьар мадни ачух хьана. Чпин алчах крар кьилиз акъудунал ада масадбурни желбзава, Украинадин цIийи фашистар Россиядал гьалдарнавайди хьиз.
Вичиз кIандайвал тийизвай Кубадал, Мексикадал, Колумбиядал гьавалат хьанва. Анжах са вичин хийирдихъ калтугнавай аждагьанди вичиз хуш такур уьлквейрал къадагъаяр илитIзава. Россиядин нафт, газ къачузвай уьлквейрихъ галаз бягьсиниз экъечIзава. Чи халкьдихъ хъсан мисал ава: «Ажал агакьай кицIи иесидин шаламар жакьвада». «Зун дуьньядин шагь я» лугьуз, майдандиз экъечIнавай Трампан эхир кьил бажагьат хъсанди жеда. Ада вири дуьньядик, чIижерин куьнуьдик хьиз, тIвал хуькуьрзава. Ида садни садрани хъсан нетижадал гъайиди туш.
Абад Азадов
