Форум
Са тIимил вахт идалай вилик Мегьарамдхуьруьн райондин Ярагъ-Къазмайрин цIийи школада «Вири ва я затIни» («Всё или ничего») лишандик кваз жегьилрин чIехи форум кьиле фена. Райондин кьил Нариман Эфендиеван куьмекни галаз тешкилай и мярекатдик кьил кутурди ФЛНКА-дин активист, спортдин обозреватель ва журналист Атав Атавов тир. Форумда машгьур гзаф спортсменри иштиракна. Кьилди къачуртIа, абурун арада авай: Руслан Абдулаев, Рашид Мегьамедов, Аловсет Мамиев, Мегьамед Мамаев, Агьмед Нажмудинов, гьакIни тренер Садир Айвазов, карчи Надир Велибегов (Стханский) ва масабур. Райондин кьилин тIварунихъай мярекатдал, кIватI хьанвайбурухъ элкъвена, администрациядин кьилин сад лагьай заместитель Фейруддин Рагьимханов рахана. Жегьилрин тIварарихъ райондин имамрин советдин председатель Алихан Сефихановани чими келимаяр лагьана.
Форумдал спортдин, сагълам уьмуьр кечирмишунин, ватанпересвилин, гьакI наркоманиядихъ, экстремизмдихъ ва неонацизмдин идеологиядихъ галаз женг чIугуниз талукь месэлаяр веревирдна. Спикерри акьалтзавай несилдин руьгьдинни ахлакьдин тербиядин, диндин, диде-бубадиз ва гъвечIи-чIехидаз гьуьрмет авунин месэлаярни фикир тагана тунвачир. Къейд авун лазим я хьи, мярекат гзаф итижлуди ва жегьилриз таъсирдайди хьана. И кар абуру активнидаказ гайи суалри ва диалогда иштирак авуни мадни хъсандиз субутзавай. Форумдин сергьятра аваз, спикерриз виридалайни хъсан суал гуниз талукьарна, конкурсни кьиле тухванвай. Гъалибчийриз рикIел аламукьдай пишкешар гана.
Къейд авун лазим я хьи, форумдин сергьятра аваз лишанлу са вакъиа мадни кьиле фена. ИкI, тежрибалу тренер-муаллим, джиу-джитсудай дуьньядин са шумудра чемпион, грэпплингдай ва гзаф маса агалкьунрин сагьиб Эйнар Экберовав Руслан Абдулаева 2-дандин чIулав чIул шад гьалара вахкана. Ада тамам кьве йис идалай вилик вичи Эйнар Экберовав шуьтруь рангунин чIул вахкайди рикIел хкунихъ галаз сад хьиз, агалкьунрин кукIушдин винизвал къалурзавай чIулав чIул мадни еке ашкъидивди вахкузвайди къейдна.
Э. Экберов 1987-йисуз Гъепцегьрин хуьре дидедиз хьана. Ана мектеб акьалтIарна, Санкт-Петербургдин МЧС-дин университетдик экечIна, «Психолог спасатель» пеше къачуна. Мектебда 6-классда кIелзавай вахтунилай Эйнар спортдал машгъул жезва. Сифтедай ада Азербайжандай тир тренер Бег Меликован гъилик дзюдодин сирер чирна. Ахпа Бут-Къазмайрал Омар Шагьмарданован ва Махачкъалада Эльмир Алибегован гъилик устадвал хкажна. Спортдин и жуьредай ам мастер лагьай тIварцIин ва чIулав чIулунин сагьиб я.
2004-йисалай Э. Экберова джиу-джитсудай ва грэпплингдай вичин къуватар ахтармишзава. Адакай спортдин и жуьрейрай дуьньядин 8 сеферда чемпион хьанва. Мадни джиу-джитсудай ва грэпплингдай кьиле фейи дуьньядин чемпионатра 4 сеферда ада гимишдин медалар къазанмишна. Кьве сеферда адакай Евразиядин чемпион хьана. 8 сеферда ада дуьньядин Кубокар къазанмишна. Ам джиу-джитсудай чемпионвилин 13 чIулунин сагьиб я. 2019-йисуз чи ватанэгьли, дуьньядин кесерлу майданра къазанмишнавай агалкьунриз килигна, «Йисан виридалайни хъсан спортсмен» яз гьисабнай. Ам международный классдин спортдин мастер я. Россиядин шегьерра кIвалахна, хайи ерийриз хтайдалай кьулухъ Эйнар стхади тренервиле зегьмет чIугвазва. И рекьяй ада махсус курсарни акьалтIарна. Мегьарамдхуьруьн райондин ЦIийи Гъепцегьрин ва КьепIир-Къазмайрин, Ахцегь райондин ЦIийи Усуррин хуьрера яргъал йисара кIвалахна. И рекьяйни адахъ еке агалкьунар авайди адан гъилик тербия ва вердишвилер къачузвай аялрин гьунарри субутзава. Ахцегь райондин кьил Абдул-Керим Палчаеван тIалабуналди Э. Экберова алай вахтунда «Ахцегь комплексда» грэпплингдай ва джиу-джитсудай тренер яз кIвалахзава.
Рагнеда Рамалданова
