РД-дин Гьукуматдин Председатель Абдулмуслим Абдулмуслимов 10-мартдиз Махачкъалада цIийиз ахъайнавай Кеферпатан Кавказдин халкьарин дуствилин университетдиз мугьман хьана.
Университет 5 факультетдикай, 5 кафедрадикай, интегративный медицинадин международный институтдикай, Имам Шамилан тIварцIихъ галай Кеферпатан Кавказдин гуманитарно-многопрофильный колледждикай ибарат я. Вуздин ректор Тавлу Казакбиеван гафаралди, университетди стоматология, фармация, клиникадин психология, психология ва са жерге маса хилерай пешекарар гьазурзава. Алай вахтунда ина очнидаказ 136 студентди чирвилер къачузва.
Республикадин премьер-министр университетда кардик кутунвай образованидин цIийи программайрихъ, лабораторийрин, илимдин центрайрин кIвалахдихъ, студентрин уьмуьрдихъ галаз мукьувай таниш хьана. А. Абдулмуслимова студентар патал арадал гъанвай алай аямдин шартIариз еке къимет гана ва ихьтин гьалари гьакъикъатдани хъсан пешекарар гьазуруниз таъсирдайди къейдна.
Вуздин студентрихъ галаз кьиле фейи гуьруьшдал гьакIни РД-дин образованидин ва илимдин министр Ягья Бучаев, РД-дин Халкьдин Собранидин комитетдин председатель Ильяс Мамаев, БРИКС-дин комитетдин эксперт Геннадий Панов ва масабур рахана.
Тавлу Казакбиева вуздиз мугьман хьунай Абдулмуслим Абдулмуслимоваз сагърай лагьана, и кар университетдин уьмуьрда лишанлу вакъиадиз элкъвейди къейдна.
Гегьеншдиз РД-дин Гьукуматдин сайтдай кIелиз жеда.
Агьмед Магьмудов
