Дагъустандин яшайишдин фондуни дяведин махсус серенжемдин иштиракчийриз ва абурун хизанриз 28 жуьредин куьмекар гузва. Идан гьакъиндай Дагъустандин зегьметдин ва яшайишдин рекьяй вилик финин министерстводи йисан нетижаяр кьазвай коллегиядал малумарна.

Яшайишдин фондунин отделенидин управляющийдин везифаяр тамамарзавай Алжанат Загьидовади  лагьайвал, талукь министерстводихъ галаз санал фондуни республикадин агъзурралди хизанриз комплексный куьмекар гузва.

«Дяведин махсус серенжемди чи вилик и чIавалди тахьай хьтин везифаяр­ эцигнава: СВО-дин иштиракчийриз ва абу­­рун хизанриз вири жуьредин куьмекар гун. Дагъустандин зегьметдин ва яша­йиш­дин рекьяй вилик финин минис­терст­во­дихъ, бязи маса ведомствойрихъ­ галаз санал гьялзавай и месэла кьилин­ди я. Министерстводи яшайишдин, психоло­гиядин рекьяй куьмек гунин месэлаяр гьялзава. Яшайишдин фондуни, яргъал тевгьена, абуруз герек кьадар пулар гун таъминарзава. Тешкилнавай махсус дес­тедин саналди тир кIвалах себеб яз, СВО-дин са иштиракчини, абурун хизанарни герек куьмек агакьар тавуна тазвач».

28 жуьредин куьмекрик ветеранриз, игитриз гузвай гьар вацран пулар, кIвалин сагьиб амачирла, пенсияр, кIвалахдин стаждал гьалтзавай кьезилвилер, набутриз технический тадаракар ва ЖКХ-дин эвездин пулар гунни акатзава. СВО-дин иштиракчийрин кIвачел заланзавай папариз ва пуд йисалди аялар авай хизанривни пулар агакьарзава.

Дяведин махсус серенжемдай кIва­лериз аххъайнавай ксари чпин сагъламвал мягькемар хъувунин месэладизни кье­тIен фикир гузва. Абурувай Россиядин яшайишдин фондуник акатзавай 12 цент­рада чпин сагъламвал хъсанариз жеда. Аскерриз Астрахандилай Хакасиядив­ агакьдалди авай сагъламвилин центрайрикай чпиз кIаниди хкядай мумкинвал ава.

«Лезги газет»