7-мартдиз Гумбет райондин  Чирката хуьре багъманчийрин арада пешекарвилин устадвал раиждай «Дагъустан Республикадин тарарин кьурай ва герек авачир хилер виридалайни хъсандиз  атIудайди» конкурс кьиле тухуда.

Мярекат Кикунидин консервиярдай заводдин куьмекдалди РД-дин хуьруьн майишатдин ва недай суьрсетдин министерстводини Гумбет райондин администрацияди кьиле тухудайвал я.

Эхиримжи вахтара гьар йисуз кьиле тухузвай и конкурс вичихъ еке игьтияж авай  багъманчивилин пешедал фикир желбунихъ, багъманчивилин хел виликди тухуз  ва пешекар кадрияр гьазуриз куьмек гунихъ элкъуьрнава. Ада гьакIни регионда дагъларин, яни  сад-садалай вине авай айванар хьиз туькIуьрнавай жуьредин  багъманчивал вилик тухунин месэладал фикир желбзава. Къейд ийин, эхиримжи йисара  и хиле алай аямдин технологияр (гьам къелемар кутунин ва гьам абурухъ гелкъуьнин рекьера) активнидаказ ишлемишзава.

Тарарин хилер атIудайбурун арада тешкилнавай  конкурсда  республикадин гьар жуьре районрай тир багъманчийри иштиракда – абур муниципалитетрин АПК-дин управленийри тайинарда. Конкурсдин жюриди тарарин кьурай ва герек авачир хилер атIунин карда гьам еридиз, гьамни йигинвилиз къимет гуда.  Гъалибчийриз ва вини дережадин чкаяр кьурбуруз къиметлу пишкешарни грамотаяр гуда.

Конкурсдин программадин сергьятра аваз,  тарарин  герек авачир хилер атIунин, къелемрихъ ва чIехи хьанвай тарарихъ гелкъуьнин, алай аямдин агротехнологияр ишлемишунин карда цIийи жуьредин амалар-рекьер къалурдай мастер-классар кьиле тухуда.

Амина Муслимова