Къецепатан уьлквейриз маса гузвай суьрсетдин кьадардиз талукь яз РФ-дин хуьруьн майишатдин министерстводи кьабулнавай къарарди Дагъустандин прунзчийриз производство гегьеншардай мумкинвал ачухнава.
2026-йисан сифте кьилелай Россиядин хуьруьн майишатдин министерстводи уьлкведа гьасилзавай прунз Евразиядин экономикадин союздин сергьятрилай къерехдиз 200 агъзур тонндин кьадарда аваз тухуниз талукь квота тайинарнава. И къарар йисан эхирдалди къуватда жеда.
Ихьтин къарар, хабар гузвайвал, Дагъустан Республикадин регьберри са шумудра арза авурдалай кьулухъ кьабулнава. Ада ватандин прунзчийриз куьмек гун ва къенепатан базар гуьнгуьна тун лазим я. Гуьзлемишзавайвал, ида маса къачудай къиметар хкаждай ва прунз цадай майданар гегьеншардай мумкинвал гуда.
РикIел хкин, эхиримжи йисара Дагъустанда прунз цазвай майданар йигин еришралди гегьеншарзавай. 2024-йисуз абурун кьадар, вад йисан вахтунда пуд сеферда гзаф хьуналди, 34,7 агъзур гектардив агакьнай. Амма 2025-йисуз, РФ-дин Гьукуматди прунз уьлкведилай къерехдиз маса гунал вахтуналди эцигай къадагъа себеб яз, маса гузвай дуьгуьдин ва прунз цадай чилерин кьадар тIимил хьана.
Саида Мурадова
