ДАМАХ ГВАЙ КЬАКЬАН ДАГЪЛАР ЧЕПЕРИН
Марф къвайила Селлер хуьряй авахьда.
Са кьил фена Каспи гьуьуьлик акахьдай.
Хважам-жам ви кьакьан кукIвал акьахда,
Дамах гвай кьакьан дагълар Чеперин.
Ярашугъ я ваз тарифар дамахар,
Гуьлчеменар, авай къайи булахар.
Уьлкведа вав кьадай авач гьич дагълар,
Дамах гвай кьакьан дагълар Чеперин.
Дагъдин чинал хипен лацу суьруьяр.
Векьиг ацIай мублагь къени ерияр.
Гьар са чIурал вичиг кьадай эвлияр,
Авай дамах гвай дагълар Чеперин.
Вил алаз чун жеда гатфар атунал,
Ви тулара цуьквер сувар тухунал,
Гьейран жеда инсанар ви акунрал
Дамах гвай кьакьан дагълар Чеперин.
ХАЙИ ХУЬР
Кимин юкьвал хуьруьн булах,
Цава къушар ягъизвай чарх,
Гуьзел мулкар гьар са патахъ
Галай гуьзел хуьр ава чахъ.
Хуьруьз къаншар къвазна сурар
Халис женнет багъдиз ухшар.
Чилик квай агьалияр
Квез Аллагьди гуй женнетар.
Инсанар квез гуй къуватар,
Хуьз кIанидаз хипер малар.
Гуьзел ятар ва яйлахар
Авай къени хуьр ава чахъ.
Куьч хьайитIан хуьруьн халкьар,
Яргъалламаз лап чеб аквар
Кьуд патахъ ва хуьруьн юкьвал,
Къванер ава хуьр хуьдай чахъ.
Чеперин хуьр хьурай мублагь.
Ам гьич ичIи тахьуй Яллагь.
Яшамиш яргъа хьайитIан,
Хуьр кIандай чанар ава чахъ.
ДИДЕ ВАТАН ЧЕПЕРИН ХУЬР
Чеперин хуьр, Чеперин хуьр
Чан чи Ватан Чеперин хуьр.
Чепери вал дамахзава,
Авадан хьуй Чеперин хуьр.
Муьтретарни камбар цуьквер,
Еке-еке лайцу къванер.
Хуш азандин авай сесер
Саламат хьуй Чеперин хуьр.
Экуьн кьиляй рушар, папар
Нехирдал физ гваз малар.
Къуьне аваз цурун кварар
Булахдал фир, Чеперин хуьр.
Бахтияран манидин ван,
Варидани ягъиз чIагъан,
Гьейран я вал гьар са инсан
Чеперин хуьр чан чи Ватан.
Зулуз хуьре ийиз мехъер,
Кимел межлис, ийиз кьуьлер.
Бахтлу хьурай жегьил кьилер,
Ви балаяр, Чеперин хуьр.
Галай вичихъ женнетдин дад,
Уьлкведа гьат хьурай ви ад.
Къуй хьурай вун мадни абад,
Чан чи Ватан, Чеперин хуьр.
ЧIалар кхьей Севинжи вах,
Вири уьмуьр галаз фей вахъ.
Ийизва вал чна дамах,
Лугьуз женнет я Чепер хуьр.
Чеперин хуьр, Чеперин хуьр!
Чан чи Ватан Чеперин хуьр!
Чна вичел дамахзавай,
Авадан хьуй Чеперин хуьр!
ЧИ ГИМН Я ЧЕПЕР ДАГЪЛАР
Цавариг кьил агакьзавай,
Аллагьдиз я Чепер къунши.
Циферикай килигзавай,
Лекьер я чун Чепер вири.
Даим дагъдин сирер чидай,
Бубайрин пак ругьер хуьрай,
Дуьньяда ислягьвал кIандай,
Лифер я чун Чепер вири.
Шалбуздагъдиз къвазна къаншар,
Уьтквем рикI авай рухваяр.
Лезги чилин тагьсиб хуьдай
Чепервир я Шарвилияр.
ТIварар кьун заз чиз герек туш,
Чепер вири я игитар.
КIевевайдаг гъил вугудай,
Намуслу я Чепер халкьар.
Чканва куьн дуьнья тирвал
Гьуьрметлу тир Чепер халкьар.
Чи гимн я Чепер дагълар
Ашукь Абдула лагьанвай.
Шиирар редакциядив писатель Бикеханум Алибеговади агакьарна
