Къацу аптека
Мандаринрин чкалрикайни гзаф хийир ава. Адет яз, бананар, мандаринар тIуьна, чна чкалар гадарзава. Мандаринрин чкалрик инсандин сагъламвал патал менфятлу ягълу, менфятлу маса гзаф шейэр кумукьзава. И жигьетдай чна агъадихъ галай рецептриз фикир гун теклифзава.
Бронхит авайла: хуьрекдин кьве тIурунавай кьурурнавай ва куьлуь авунвай мандаринрин чкалрал 1 истиканни зур ргар яд илична, цIай явашарна, 5 декьикьада, ахпа са сятина къалпагъ алаз тур. Куьза. Йикъа 2-3 сеферда, хуьрек недалди вилик зур сят амаз, истикандин са паюна авай къаришма, чими ийиз, хъухъ.
Грипп, уьгьуьяр квайла: са гъапа авай куьлуь авунвай чкалар са къапуниз вегь, винелай ргар яд цуз ва 10-15 декьикьада гьа бугъадал (пардал) нефес чIугу. Идалай кьулухъ куьчедал экъечIмир.
КIвачин кикерик хал (грибок) квайла, йикъа кьве сеферда абурувай мандариндин таза чкал гуьцIа.
Ахвар авачирла, давление хкаж хьайила, нервияр къайдадик квачирла, тазазмаз куьлуь авунвай са истиканда авай кьван чкалрал 3 литр ргар яд илична, мад са звал акъудна, са сятда чими чкада тур. Куьзна, яд ваннада цуз (37-39 градусдин чими). Ксудалди са сят амаз, 15 декьикьада и це къаткук.
РикI кузвай, хуквада хирер, гастрит авай ксари санлай 3-4 мандарин тIуьн хъсан туш.
Гуьгъуьнин макъалайра чна квез хъуьтIуьн тIебиатдин «аптекадикай» гегьеншдиз кхьида. Квез Аллагь куьмек хьурай!
Башир Шихмурадов,
Теймур Гьабибов
