Къецепатан уьлкведа кlвалахзавай Россиядин лингвист, методист, кавказовед, филологиядин илимрин доктор, урус чlалан кафедрадин профессор Герман Ибрагьимович Агьмедов Берлиндин Вест-Ост институтдин, GIMC-дин (Германиядин менеджментдин ва коммуникациядин институт) профессор, РАЕ-дин член-корреспондент, “Язык. Словесность. Культура” журналдин редакциядин советдин ва Европадин Естествознанидин Академиядин член я.
Агьмедов 1962-йисан 18-январдиз Мегьарамдхуьре дидедиз хьана. 1984-йисуз ада Дагъустандин госуниверситетдин филологиядин факультетдин урус чlалан отделение куьтягьна. Машгьур профессор Агьмедулагь Гуьлмегьамедован регьбервилик кваз Герман Агьмедова “Способы передачи значения заимствований в русскоязычной художественной литературе” темадай дипломдин кlвалах кхьена.
1984-1986-йисара ада мектебда урус чlаланни литературадин ва 1986-1988-йисара ДГПУ-да урус чlалан тарсар гана. 1990-йисуз Москвадин образованидин милли месэлайрин НИИ-дин аспирантурада кlелна ва профессор Р.Сабаткоеван регьбервилик кваз “Развитие русской монологической речи студентов-филологов” темадай диссертация хвена.
Герман Ибрагьимовича са кьадар йисара ДГПУ-дин урус чlалан тарсар гунин методикадин кафедрадин доцент яз кlвалахна. 1994-1995-йисара ада Москвада Ломоносован тlварунихъ галай госуниверситетда пешекарвилин дережа хкажна. Илимдин кукlушрихъ хкаж жезвай алимди гуьгъуьнлай Братиславада (Словакия) Я.Коменскийдин тlварунихъ галай университетда урус чlаланни литературадин кафедрада доцент яз кlвалахна.
1999-йисуз ада РАН-дин чlалан илимдин институтда докторвилин диссертация хвена. 2000-йисуз ДГПУ-да урус чlалан кафедрада профессор яз кlвалахна. 2001-йисуз алакьунар авай алим кьисметди Германиядиз акъудна. Герман Агьмедова ана винидихъ къейднавай институтда зегьмет чlугвазва.
Герман Ибрагьимовича Россияда, Гуржистанда, Германияда, Норвегияда ва Великобританияда кьиле физвай илимдинни тежрибадин жуьреба-жуьре конференцийра активнидаказ иштиракзава. Ада 120-далайни гзаф илимдин кlвалахар кхьенва. Адаз “Илимдин мектебдин бине кутурди” лагьай гьуьрметдин тlвар ва маса наградаяр ганва.
Куругъли Ферзалиев
