Чи ватанэгьлияр – гьар сана
Россиядин Федерациядин Президентдин къарардин бинедаллаз здравоохранение вилик тухуник еке пай кутур медицинадин хилен са жерге къуллугъчийриз мукьвара гьукуматдин орденарни медалар гана. Лука Крымскийдин медаль ганвайбурун арада вичин ери-бине СтIал Сулейманан райондай тир, 2022-йисалай инихъ Москвадин здравоохраненидин департаментдин В.М. Буянован тIварцIихъ галай клиникадин азарханада кIвалахзавай Эльман Маратович Мейлановни ава.
Вуж я ам, Москвада кIвалахзавай, вичин гьакъисагъ зегьметдалди чIехи шегьерда гьуьрмет къазанмишнавай, гьукуматдин шабагьдиз лайихлу хьанвай духтур?
Мейлановрин сихил райондилай къецени машгьур я. И сихилдай чIехи дережайрин гьакимар, алимар, муаллимар, духтурар, маса пешейрин сагьибар акъатна.
Эльман Мейланов хуьре-кIвале гьуьрмет авай Марат Шарафудиновичан ва Рабият Мирзоевнадин хизанда дидедиз хьана. 1998-2009-йисара Эльмана ЦIийихуьруьн юкьван школада кIелна. Лап хъсан къиметар аваз кIелунилай гъейри, Э. Мейланов спортдин секцийра азаддаказ кьуршахар кьунал ва боксдал машгъул хьана, районда ва адалай къеце тухвай акъажунра агалкьунар къазанмишна. Юкьван школа акьалтIарай 2009-йисуз Эльман Астрахандин медицинадин госуниверситетдик экечIна. Студент тир йисара академиядин жемиятдин ва илимдин уьмуьрда активвилелди иштиракна.
2011-йисалай Эльман Мейланов студентрин илимдинни ахтармишунрин кружокра ва конференцийра, психиатриядин экстремальный медицинадин, педиатриядин, терапиядин, неврологиядин, клинический фармакологиядин, факультетский хирургиядин ва суддин медицинадин кафедрайра машгъул хьана, жуьреба-жуьре хилерай алава чирвилер ва тежриба къачуна.
Эльман Маратовича 2015-йисуз госмедуниверситет хъсан чирвилер аваз акьалтIарна, гуьгъуьнин кьве йисуз Астрахандин ГМУ-да «Анестезиология-реаниматология» пешедай ординатурада кIелна. И пешекарвиляй алай вахтунда Э. Мейланов уьлкведин меркезда лап хъсан духтуррин жергеда ава. Им, гьелбетда, кьегьал лезги хцихъ хъсан чирвилер ва, са шакни алачиз, хкянавай пешедив рикI гваз эгечIуналди кIвалахунин, гзаф йисарин тежриба хьунин нетижа я. Ада 2015-йисан 1-сентябрдилай 2016-йисан ноябрдалди Москвадин С. М. Кирован тIварцIихъ галай 3-нумрадин клиникадин азарханада ва “Областной онкологический диспансер” ГБУЗ-да анестезиологиядин ва реанимациядин отделенийра кIвалахна.
Эльман Мейланова гуьгъуьнлай (2017-йисан ноябрдилай 2022-йисалди) вичин пешедай кIвалах Александро-Маринский областной клиникадин азарханада, областдин госпиталда ва Москвада “ММКЦ “Коммунарка” ДЗМ” ГБУЗ-да давамарна.
Интернетдин куьмекдалди чаз жагъай делилрай малум жезвайвал, Москвадин областда дерин чирвилер ва тежриба авай анестезиолог тир Э. Мейлановахъ вичин пешедихъ галаз алакъалу гзаф хилерай (эндотрахеальные анестезии, спиномозговая анестезия, внутривенная анестезия, катетеризация центральных и периферических сосудов, сердечно-лёгочная реанимация…) чирвилер, гьакIни алай аямдин чи уьлкведа ва къецепата акъуднавай наркоздинни нефесдин аппаратурайрихъ галаз кIвалахдай вердишвилер ава.
Э. Мейланован яргъал йисарин намуслу зегьмет Москвадин здравоохраненидин департаментдин, ада кIвалахай азарханайрин ва исятда кIвалахзавай В.М. Буянован тIварцIихъ галай клиникадин азарханадин кьиле авайбуру са шумудра грамотаяр гуналди къейднава.
Чи ватанэгьлиди 2022-2023-йисара 30 юкъуз Ростов шегьердин азарханада СВО-да хирер хьайи цIудралди чи офицерризни аскерриз медицинадин рекьяй къуллугъна, абурун сагъламвал мягькемар хъувуна.
Россиядин Президентдин къарардалди ганвай Лука Крымскийдин медаль мубарак авуналди, чна лайихлу хва Эльман Мейлановахъ кIвалахда мадни еке агалкьунар хьун алхишзава.
Хазран Кьасумов
