Дагъустандин Кьил Сергей Меликова талукь идарайриз алатай йисан эхирра республикадин здравоохраненидин ва образованидин хилен къуллугъчийриз таганвай премияр хгун буйругъна.
2025-йисан декабрдин вацра республикадин са духтурханада кIвалахзавай медсестради Сергей Меликоваз вичиз ва вичихъ галаз санал кIвалахзавай юлдашриз премия таганвайдакай хабарна.
13-январдиз Махачкъалада кьиле фейи совещанидал РД-дин здравоохраненидин министр Ярослав Глазова гъавурда турвал, йисан эхирдай здравоохраненидин гьи идарайрал кредитрин буржар алайтIа, гьанра кIвалахзавайбуруз премиярни ганвач.
Госстандартдин бинедаллаз премияр къачуниз лайихлу, амма жуьреба-жуьре себебралди пулдин такьатар агакь тавурбурун арада са жерге муниципалитетрин мектебра, аялрин бахчайра кIвалахзавай пешекарарни ава.
«Вучиз бязи кьилевайбурун жавабдарсузвал себеб яз гьам суваррин, гьам ял ядай йикъара чпин везифаяр намуслудаказ кьилиз акъудзавай жергедин къуллугъчийрин ихтиярар чIурзава? Ахьтинбур жавабдарвилиз чIугуна, кIвалахдилай алудна кIанда ва къуллугъчийриз талукь премияр гун герек я. Абуру куь мукьвабур сагъар хъийизва, куь аялриз тербия гузва…», — лагьана Дагъустандин Кьили.
И месэла гьялун патал Сергей Меликова вице-премьер Абдурагьман Магьмудоваз, талукь министерствойрин кьилериз буйругъар гана.
Чи мухбир
