Августдин сифте кьилера Самур дереда авай районра къати марфар къуникди гьихьтин бедбахтвилер арадал атанайтIа, гьадан патахъай газетди инсанар гъиле-гъил аваз хабардарнай.  Гуьгъуьналлаз и завалдин са хел Агъул, Хив, Сулейман-Стальский районрин сергьятра авай хуьрерин  мулкаризни атана.

ИкI, 18-августдин рагъдандихъ инра сифте хар, гуьгъуьналлаз харни марф какахьна къвана. Са арада къун акъваз хьана, ял акъадарна хьиз, пакамалди давам хьана. Нетижада кIамарай, чухуррайни гуьнейрай атай ятари Гуьлгери -чай вацIа цин дережа хейлин хкажна. Муькъуьн патав гвай, цин деринвални зарбвал алцумдай тадаракди къалурайвал, вацIа яд кьве метрдилайни артух хьана. Зарбдиз къвезвай ци, къван-чарх, тар талгьуз,  вичин хурук акатай вири тухузвай. Сардархуьруьн, Алкьвадрин, анлай алатайла, Куьрхуьруьнни Сийидхуьруьн патарив гвай чкайрани чилер тухвана.

Къейд ийин хьи, Давудан муькъуьн кIаникай гзаф зарбдиз хкатиз хьайи ци агъадихъай вацI гегьеншарна, гзаф чкаяр, кьилди къачуртIа, 7-8 метрдин сагъ чил, инсанар мереяр, вакIан кIирияр гъиз фидай, улакьра аваз къванер, херхем гъиз хьайи машиндин рехъни тухвана. Санлай ахьтин чкайрин, арадал атанвай цIийи кьваларин яргъивал 1700 метрдилай гзаф я. Яд патав, лапагар, малар хуьз, лежбервилин майишат кутунвай фермер Агъаханан фермадиз мукьва хьанва. ГатIун­рихъ, Кьасумхуьруьхъдини ва­цIу чка-чкадай патар акъуднава. Хару, марфади ичер, чуьхверар, шуь­мя­гъарни­ кIвадарна. Дигмиш жезвай ципицI­ризни зиян тахьана амукьнач. Гена инсанриз хасаратвал хьанач.

Райсудин Набиев