ЦIийи ктабар

Хасавюрт райондин ЦIийи Къурушрин хуьре яшамиш жезвай Мамедов Ризван жемятдиз хъсан общественник, зегьметкеш, туькIвей хизандин кьил хьиз чида. Адан ери-бине Ахцегь райондин гила амачир Игъиррин хуьряй я. И мукьвара Р. Мамедова «Санал кIватI жен» (урус чIалал) ктаб-каталог акъудна. 

Дагълух Игъиррин хуьруьхъ, чаз ашкара тирвал, дерин ва баркаллу тарих ава. 1950-йисуз Хасавюрт райондиз куьчарай игъирвияр ана къурушвийрихъ галаз са хизан хьиз яшамиш жезва. Алай вахтунда ЦIийи Къурушдал игъирвийрин 130 кIвал ала. Чи йикъара адет хьанвайвал, абурукайни­ гзафбур, иллаки жегьил хизанар, хайи чиливай яргъара, Россиядин гьар жуьре регионра яшамиш жезва. ИкI, абурун саки 80 кIвал Тюмендин областдин Нижневартовск шегьерда ава. Игъирвияр Азербайжанда, Къазахстанда, Украинада, ОАЭ-да, Чехияда, США-да яшамиш жезвайдакайни малум я.

Хийир-шийирдин мярекатриз, гьакI герек атай дуьшуьш­рани хуьруьнвийриз чпиз чеб жагъурун регьят хьун патал Р. Мамедова, вичин гьакъидихъ телефонрин нумрайрин ва адресрин каталог акъудна, виридаз пайна. Каталогда телефонрин саки 500 нумра гьатнава. Ам хуьруьн агъсакъалрин ва хайи чкайрин шикилрини безетмишнава.

Гь.  Къазиев