Алай йисан 17-22-ноябрдин йикъара Нижний Новгородда Вирироссиядин «ЧIехи перемена» конкурсдин финал кьиле фена. Шадвилелди къейд ийин хьи, конкурсдин юкьван пешекар образованидин идарайрин студентрин арада I дережадин лауреат ва 200 агъзур манатдин кьадарда авай шабагьдин сагьиб лагьай тIвар чи ватанэгьли, вичин ери-бине Мегьарамдхуьряй тир ДГУ-дин колледждин студентка Лейла Маратовна Магьмудовади къазанмишна.
Сад лагьайбурун гьерекатдик акатзавай виридалайни чIехи проект тир «ЧIехи перемена» конкурс жегьилрин крарай Федеральный агентстводин куьмекдалди кьиле тухузва. 2025-йисалай ам «Жегьилар ва аялар» милли проектдин пай хьанва. «ЧIехи перемена» неинки конкурс, гьакIни образованидин рекье гегьенш майдан я. Адан сергьятра аваз алай аямдин пешекарвилерин алемда кар алайбур тир компетенцийриз (и ва я маса месэла гьялун патал лазим чирвилерин, алакьунрин, вердишвилерин кIватIал) къимет гузва. Конкурсдин иштиракчийри адетдинбур тушир месэлаяр гьялзава ва и кардив яратмишунин тегьерда эгечIзава, командада аваз кIвалахзава, тешкилатчивилин алакьунар къалурзава — и кьетIенвилери абурун гележегдин пешедин рекье бине кутада.
Конкурсдин вири дережайрай ДГУ-дин колледждин «Информациядин къурулушар ва программирование» пешекарвиляй 3-курсунин студентка Лейла Магьмудова виниз тир агалкьунралди экъечIна ва гъалибвал къазанмишна.
«Лейладин гъалибвал — им адан бажарагъдин, къастунал кIевивилин, адетдинди тушир жуьреда фикирунин нетижа я. Ада агалкьунрин бинеда неинки чирвилер, гьакIни къилихдин, акьулдин кьетIенвилер, юлдашрихъ галаз алакъада аваз кIвалахунин алакьунар авайди субутна. Заз лугьуз кIанзава хьи, Лейладин и агалкьуни юкьван пешекар образованидин идарайрин студентривай вини дережада аваз гьуьжетиз жезвайди, чи жегьил пешекаррихъ еке мумкинвилер авайди тестикьарзава», — къейдзава жегьилар конкурсдиз гьазур жедайла насигьатчивал авур колледждин директордин заместитель Сабина Мухтаровна Велиевади.
Лейла ери-бине Мегьарамдхуьряй тир Магьмудоврин хизанда 2008-йисуз дидедиз хьана. Адан буба Марат Магьмудова Сочи шегьердин эцигунардай компанияда кIвалахзава, диде Эльмира Алиусмановна Махачкъалада авай медицинадин рекьяй тади куьмекдин РКБ-да яргъал йисара кIвалахзавай рикIин духтур я. Махачкъаладин 26-нумрадин юкьван мектебдин 9-класс лап хъсан къиметралди акьалтIарай руш ДГУ-дин рекъемрин къурулушрин ва программированидин рекьяй колледждик экечIна. Гьам школада, гьамни колледжда кIелзавай йисара ада республикадин ва Вирироссиядин жуьреба-жуьре гзаф кьадар конкурсра иштиракна ва гъалибвилерни къазанмишна.
Идалайни гъейри, ада хъсан кIвалахрин зурба майдан тир «Добро.рф» жемиятдик квай волонтер яз, мергьяматлувилин кIвалахра, жуьреба-жуьре мярекатра гуьгьуьллудаказ ва активнидаказ иштиракзава. Лезги халкьдихъ ихьтин, яни къастунал кIеви, чирвилерихъ ялзавай, мергьяматлу рикI авай ва халкь патал менфятлу крара гьевеслудаказ иштиракзавай жегьилар хьунал чна рикIин сидкьидай шадвалзава.
Жасмина Саидова
