Донбассда кьиле физвай женгинин махсус серенжемдикай рахадайла, сифте нубатда чи фикирдиз ана иштиракзавай жуьрэтлу офицерарни аскерар къведа. Абурукай гьар сад чи йикъарин игит я. СВО-дин иштиракчийриз вирида гьуьрметзава, женгинин майданра телеф хьайи кьегьалар, абурун игитвилер инсанри рикIера хуьзва.
Махсус серенжемдин зонада чпин буржи тамамарзавай офицерарни аскерар, отпускдиз хтайла, хуьрерин агьалийри, чкадин гьукумдин органрин векилри хушвилелди кьабулзава, школайра, культурадин маканра гуьруьшар тешкилзава, абурун гуьгьуьл къачузва.
И йикъара Эминхуьруьн ктабханада, хуьруьн поселенидин кьил Руслан Мегьамедован иштираквал аваз, СВО-дай отпускдиз хтанвай И. Рамазановахъ галаз гуьруьш кьиле фена. Мярекат, кьегьал хва тебрик авуналди, ктабханадин заведующий Алла Буржалиевади ачухна.
Имамудин Рамазанова вичин къуллугъдикай, СВО-да чи офицерри ва аскерри къалурзавай кьегьалвилерикай итижлу ихтилат авуна. Руслан Мегьамедова Ватандин вилик вичин пак буржи кьилиз акъудзавай вири хуьруьнвийриз сагърай лагьана, махсус серенжемдин иштиракчийрал вирида дамахзавайди къейдна.
***
Эминхуьруьн ктабханада мукьвара «Аскердин гьунарлувиляй», «Женгера тафаватлу хьунай», Жукован медалар авай Расим Алимирзоевахъ галаз гуьруьш кьиле фена.
Мярекатда хуьруьн администрациядин кьилин пешекар Къизилгуьл Мегьамедовади, кIелдайбуру, СВО-дин иштиракчи Максим Рамазанован диде Ильяна Рамазановади иштиракна.
Расим Агъамирзоева СВО кьиле тухунин метлебдикай, ана чи Яракьлу Къуватри тамамарзавай везифайрикай, вичихъ галаз санал къуллугъзавай аскеррин кьегьалвилерикай итижлу рахунар авуна, махсус серенжемдин иштиракчийрин ва абурун хизанрин гьакъиндай ийизвай къайгъударвиляй райондин кьилевайбуруз сагърай лагьана.
Ктабханадин заведующий Алла Буржалиевади Имамудин Рамазановаз, Расим Агъамирзоеваз лезги авторрин ктабар бахшна.
Хазран Кьасумов
