9-декабрдиз Махачкъалада Ватандин Игитрин йикъаз талукьарнавай мярекатар кьиле фена. Ана РД-дин Гьукуматдин Председатель Абдулмуслим Абдулмуслимова, Россиядин Игит Загьид Загьидова, республикадин Гьукуматдин сад лагьай вице-премьер Руслан Алиева, министерствойрин, ведомствойрин кьилери, СВО-дин ветеранри ва масабуру иштиракна.

Абуру Россиядин Игит Мегьамед Нурбагандован гуьмбетдив цуьквер эцигна, Ватан патал чанар къурбанд авур кьегьалрин экуь къамат рикIел хкана.

Мярекатдал рахай А.Абдулмуслимова къейд авурвал, дагъустанвияр вири девирра викIегь кьегьалар яз Ватандин азадвал хуьн патал кьиле фейи женгера кIвенкIвечи жергейра хьана. Чи йикъара Украинадихъ галаз кьиле физвай махсус серенжемдани гьакI я. СВО-дин иштиракчияр тир 17 дагъустанвидиз Россиядин Игит лагьай тIвар ганва.

Премьер-министрди рикIел хкайвал, Советрин Союздин сифтегьан Игитрикай сад Мегьамед Гьажиев тир. Бубайрин кьегьал крар гуьгъуьнлай къвезвай несилри баркаллувилелди давамарзавайди къалурзавай чешнейрикай сад Мегьамед Нурбагандован игитвал я. Ада къанлуйрин есирда гьатай чIавуз кIусни ажузвал къалурнач. Гьа чIавуз ада лагьай «КIвалаха, стхаяр» гафар вири уьлкведа машгьур хьана.

«ВикIегьвилер къалурнавай игитар чахъ мадни ава. Загьид Загьидов, Мегьамед Баачилов, Нурмегьамед Гьажимегьамедов… Бязи кьегьалар къе чи арада амачтIани, абурун тIварар чи рикIера ава. Чи кьилин макьсад акьалтзавай несилар хайи чил кIани ватанпересар яз чIехи авун я», — лагьана А.Абдулмуслимова.

Гегьеншдиз РД-дин Гьукуматдин сайтдай кIелиз жеда.

Агьмед  Магьмудов