Дагъустандин Гьукуматдин Председатель Абдулмуслим Абдулмуслимов 2-декабрдиз РД-дин гражданский оборонадин, кьетIен гьаларин ва тIебиатдин бедбахтвилин зиянар алудунин рекьяй министр Нариман Къазимегьамедовахъ галаз гуьруьшмиш хьана.
Гуьруьшдал алай йисан 10 вацра кьетIен гьалар ва цIаяр кьунар тIимил хьуниз, цIаярикай хуьдай къуллугъ вилик тухуниз, агьалияр вахтунда хабардар авуниз талукь яз тухвай кIвалахдиз ва РД-дин Кьил Сергей Меликован тапшуругъар уьмуьрдиз кечирмишуниз талукьарнавай гьахъ-гьисаб авуна. Малумарайвал, 2025-йисан 10 вацра Дагъустандин «112» къурулушдиз 3 миллиондилай гзаф зенгер атана.
Гуьруьшдал гьакI регионда кьетIен гьалар арадал атай вахтунда агьалияр хуьнин, абурун хатасузвал таъминарун патал тухузвай кIвалахни веревирдна. Гъилевай йисуз геле къекъведай ва къутармишдай къуллугъдин къуватралди 361 мярекат кьиле тухвана.
Арадал къвезвай кьетIен гьалар алудун ва агьалияр хабардар авунин рекьериз чара авун патал 248 миллион манатдин къиметдин материалар гьазурнава. Йисан эхирдалди яд акьалтай чкайрай яд акъуддай чIехи къуват авай насосдин са шумуд станцияни маса къачудайвал я.
2025-йисуз министерстводин вири къуллугъар патал 23 миллион манатдин къимет авай шейэр, тадаракар, техника маса къачуна.
Агьалийрилай къвезвай зенгериз вахтунда жаваб гунин мураддалди республикада «112» система кардик ква. Ада умудлувилелди кIвалахзава, республикадин гьи пипIяй къалабулух квай хабар атайтIани, жаваб гузва ва талукь бригадаяр чкадал физва.
Агьалияр хабардар ийидай региондин система хъсанардай кIвалахни давамарзава. 2025-йисуз республикадин бюджетдай чара авунвай 94,8 миллион манатдин сергьятра аваз, Дагъустандин 47 муниципалитетда агьалияр хабардар ийидай 83 пункт кардик кутунва. Мадни муниципальный 10 тешкилатда 17 пункт тешкилунин кIвалахар куьтягьдайвал я. Санлай къачурла, гъилевай йисуз муниципалитетра агьалияр хабардар авунин къурулуш арадал гъун патал 53,2 миллион манат чара авунвай. Гила лугьуз жеда хьи, кьилиз акъуднавай кIвалах себеб яз, республикадин 2 миллионни 320 агъзур кас хабардар ийидай мумкинвал хьанва.
Дагъустандин МЧС-ди датIана дяведин махсус серенжемда иштиракзавайбур патални герек шейэр рекье твазва.
Абдулмуслим Абдулмуслимова ведомствода менфятлу кIвалах тешкилайвиляй Нариман Къазимегьамедоваз сагърай лагьана.
Абад Азадов
