«Вахт, акъваз вун, яваш алад…»
СтIал Сулейманан райондин Гуьне патан къадим Шихидхуьряй тир Ханамиров Гуьлмета вичиз гьа ихьтин тахаллус къачунва — Амин Шихиви. Адан чIехи стха, гьайиф хьи, азарди чавай фад къакъудай Къазагьмед муаллимдини за университетда санал кIелнай, чи дуствални эхирдал кьван амукьнай. Гуьлмет жегьил береда Къазагьмед муаллимди заз са сир ахъайнай ва вичин стхади теснифнавай шиирриз къимет гун тIалабнай. Зани абур жува кIвалахзавай лезги радиодин са программадик кутунай. Гила ингье Гуьлметан къелемдикай хкатнавай «Дагъви я зун» ктабдихъ галаз таниш хьана. Яратмишунриз за къимет гудач, са кар къейд ийида: гьар са шиир, гьар са фикир адан вичин рикIяй атанвай хсуси инанмишвилер ва уьмуьрдинни авур кеспидин тежрибади ганвай тарсарни чирвилер я.
Гуьлмет Ханамиров юстициядин старший советник я. 1978-йисуз Шихидхуьруьн школа вадралди куьтягьай жегьил Воронеж шегьердиз акъатна. Армиядин жергейра къуллугъна хтайла, ам гьана университетдин юристар гьазурдай факультетдиз гьахьна. 1987-йисуз, кIелунар акьалтIарна, Махачкъаладиз хтай жегьил пешекарди юристконсулвиле, шегьердин Ленинский ва Кировский районра прокурордин куьмекчи яз, республикадин прокуратурада жавабдар къуллугърал, Мегьарамдхуьруьн прокурорвиле, гьакIни Каспийск ва Къизляр шегьерра кIвалахна. Гъиле авай йисан гатфариз ам пенсиядиз экъечIна.
«Гила заз жуван фикиррал кIвалахдай, ярар-дустарихъ галаз алакъаяр кутIун хъийидай вахтни, мумкинвилерни жеда», — шадвал ийизва ада. КIела, гьуьрметлубур! Вири уьмуьрда къанун-къайдайрин къайгъуда аваз хьайи, Дагъустандин лайихлу юристдин тIвар къачунвай, вичиз РФ-дин генеральный прокурордин приказдалди «Почетный работник прокуратуры РФ» ва гьакIни тIвар алай яракь ганвай прокурордихъ чи инсанрин алакъайрикай, абурун гьиссерикай ва абуррикай, халкьдин ацукьун-къарагъуникай гьихьтин фикирар ва веревирдер аватIа чир жеда квез. Гуьлмет Мусаевич Ханамиров, гила бязибуру хьиз, «зун шаир я!» лугьуз, хуруз гъуд язавай кас туш. Ам, шиирар кхьиналди, вичин рикIик квай гарни заланвал хкудзавай, уьмуьрдинни кьисметрин азабар руьгьдилайни гуьгьуьлдилай алудзавай адетдин инсан, адетдин дагъви, адетдин лезги я.
Абдуселим Исмаилов, Дагъустандин халкьдин писатель
__________________________________
Зун дагъви я
Зун дагъви я дагълара хайи,
Дагълар зи кIвал я, макан я зи.
Кьисметди гьиниз тухвайтIани,
РикIелай алатдач ватан зи.
Зун дагъви я дагълара хайи,
Ятар хъвайи булахрин къайи.
Хура къекъвезва гьава михьи
Нефесдик зи кутур дагълари.
Зун дагъви я дагълара хайи,
Инсан я зун дагълара вердиш.
Хъсан чкайриз зун акъатайтIани,
Дагъларихъ зун жеда дарихмиш.
Дагълара хайи дагъви я зун,
Бедендик квай лекьерин иви.
Эгер яргъара кьейитIа зун,
Руьгь зи хкведа дагълариз хайи.
Атанач, яр, вун зи патав
Жегьил чандик цIай какатна,
Муьгьуьббатди яна ялав.
Марфарин вахт куьтягь хьана,
Атанач, яр, вун зи патав.
Рагъ алай югъ алат хьана,
Гъетеривди ацIана цав.
Вахъ муьгьтеж яз, рикI акъатна,
Атанач, яр, вун зи патав.
Акъатна кьуьд, атана гад,
Чими вахтар агакьна чав.
Ша лугьуз ваз авуна дад,
Атанач, яр, вун зи патав.
Гьикьван тада на зун пашман,
Гьихьтин гаф гва, Суна чан, вав?
За илчияр ракъурнатIан,
Атанач, яр, вун зи патав.
Ашкъид парар залан хьана,
Эхиз жезмач рикIивай зи.
Ишез-ишез лугьузва за
Кьисмет тахьай ярдиз мани.
Ахлад, зун ваз таквадайвал
Герек туш заз тупIални цам,
Тагайла на ашкъи тIарам.
Вилик вегьей элкъуьрна кам,
Ахлад, зун ваз таквадайвал.
Ацукьдач зун авуна хъел,
Ви тIвар хуьдач зи кай рикIел.
Рекьел зи тун тавуна гел,
Ахлад, зун ваз таквадайвал.
Герек тушир твамир ванер,
Хуьз тежедай кьамир кьинер,
Вахчуна геж гайи цуьквер
Ахлад, зун ваз таквадайвал.
Ахмакь Агьмад
Уьмуьрда фу бегьем тахьай
Агьмад хьана са къуллугъдал.
Физ амукьнач вердиш патай,
Хъуьрез хьана ам таярал.
Къуллугъдикай гьатай вичиз
Кеф чIугваз ам машгъул хьана.
Югъди-йифди фикир ийиз,
КIвал пулунвай ацIуз хьана.
Хабар кьазмач аялрикай,
Фикирзамач папакайни.
Адет хьанва патаз фидай,
Хквезмач ни кIваликайни.
Гила тунва ада кьиле,
Вичи вичиз гана буйругъ,
Алахънава лап кьаз гъиле
Регьбердив гвай чIехи къуллугъ.
И кар патал чIугур зегьмет
Бада фенач – шад я Агьмад.
Къуллугъдихъ къе гайи къимет,
Шак алачиз, хьанвай зурбад.
И шиирдин игитди чи
Бахтун гьуьле сирнавзава.
Квазни кьазмач чIехи-гъвечIи,
Вич пачагь хьиз къалурзава.
Нефсни иштагь къативуна,
ЭгечIна ам гелир къачуз.
Девлет кIватIиз, кьве вил туна,
Ар-эдебдиз фикир тагуз.
Къаних хьана, ажугълу тир,
Девлет зурба кутаз кIаник.
Амалдивди таз амачир
Гаф лугьудай кас къваларив.
Агьмадакай, къвез-къвез, хьана
ТIвар-ван авай баш къуллугъчи.
Вичин къайда-тегьер кьуна,
Хьана адкай сиясатчи.
Агалкьунрин хьана эхир,
Цавар гьинай — чилер гьинай.
Чи Агьмадан хтана нехир,
Силисчидин гъиле гьатай.
Чир хьухь, инсан, жемир алчах,
Уьмуьрдин кьел девлет-мал туш.
Къуллугъдикай кьамир чардах,
Амни бубадин кавал туш.
Ахьтин мехъер заз герек туш
Гьикьван хьайтIан гуьзел суна,
Ашкъивачиз жедач савда.
ЧIехи стха гъенел туна,
Ахьтин мехъер заз герек туш.
Лишан тухуз вахтар тагай,
Гьалав лугьур тедбир тахьай,
Ша лагьана, дустар татай,
Ахьтин мехъер заз герек туш.
Диде-буба рази тушиз,
Свас къведайла жуван кIвализ,
Шадвал квачиз, капар ягъиз,
Ахьтин мехъер заз герек туш.
Лезги далдам, зуьрне тахьай,
Межлисни дем хуьре тахьай,
Мани-кьуьлер сегьне тахьай,
Ахьтин мехъер заз герек туш.
Зун гъетериз килигзава
Зун гъетериз килигзава
Лап яргъал тир цава авай.
Хиялар зи дерин жезва,
Фикир ийиз уьмуьрдикай.
Рахазва зун гьар са гъетрев
Цавун аршда акъвазнавай.
Гъетерикай туькIвей «севрев»,
Чилел эквер ракъурзавай.
Варз аквазва лап чубан хьиз,
Гъетер тунвай дуьз суьруьда.
Уьмуьрдин рехъ чи, гъетер хьиз,
Туна вацра дуьз суьгьуьрда.
Уьмуьрдин чи еке лукьман,
Вав агакьуй чи минетар.
Чун вири ваз жеда мугьман,
Гъетер хьана чи кьисметар.
Вад къизилгуьл
Жегьил гадайрин арадай
Акуна заз вун килигиз.
Хъфидайла кIвализ паркунай,
Атанай вун зи къаншардиз.
Салам гана, акъвазна вун,
Сятинин вахт хабар кьуна.
Ви уьтквемвал акурла зун,
Амукьна гьакI чIалар кьуна.
Вун акъвазна, алатна зун,
Фена жуван герек рекьиз.
Пакад юкъуз акуна вун,
Цуькверни гваз зун гуьзетиз.
Вад къизилгуьл гьар рангунин,
Ашкъидалди заз багъишна.
Эцигна са вахт сятинин,
Гуьруьшдиз атун алхишна.
Зи мецел са гаф атанач,
На кьурла гъил мукъаятдиз.
Акси амал завай хьанач,
Аватайла ви къужахдиз.
Вад къизилгуьл, вад цуьк гуьзел,
Ашкъи туна куьне рикIе.
Дамахзава кIанивилел
Ярдихъ галаз бахтлу рекье.
Вахт, акъваз вун
Зайиф хьана, кьуьзуь хьана,
Юкь вегьена, къекъвезва ам.
Уьмуьрдин рехъ куьруь хьана,
Перишан яз аквазва ам.
И дуьньядин вири булахар
Агакьнач кьуьзек дадмишиз.
Амазма гъиле кьур кIвалахар,
Вахт акъваздач хьи тамашиз!
Вахт, акъваз, вун яваш алад,
Хабар яхъ на кьуьзекакай!
Агакьда вун ийиз инад,
Вил атIурай дуьньядикай!
Зун физва, кьулухъ элкъвен тийиз
Зун физва, кьулухъ элкъвен тийиз,
Дердерин гъиляй зун хьанва ажуз.
Яргъал я рехъ, фидайла текдиз,
Амма хиялри зун тазвач ялгъуз.
Хкизва рикIел крар атай кьилел,
ТIалар хьана хирер авур рикIе.
Амач къе дустар хвейи гъилел,
Гьакъикъатда гьатайла кIеве.
Зун физва, кьулухъ элкъвен тийиз,
Залан ятIан и кьисметдин парар.
Кьил хкажна, виждан кьуна кIевиз,
Такабурдиз вегьезва камар.
Чизва, кьисметдикай кис жедач,
Ам Аллагьди гузвай затI я чаз.
Зегьер ятIан кьисметдин хъач,
ТIуьн тавуна жедач чавай таз.
ВетIрен хесет
ВетIрен гъиляй ажуз жеда,
Гад хьайила, инсанни кваз.
КIасиз, иви къачуз жеда,
Залумдин шей вилиз такваз.
Ахпа жеда гьелек хьана,
КIасай патар чухваз гъилив.
Кьисас вахчуз зирек жеда,
Акъвазда вун ветI хуьз вилив.
Мукъаятдиз тахьайтIа дуьз,
КьецIил жендек сагъдиз тадач.
АквазватIан чеб чаз куьлуьз,
Бизарда, руьгь чагъдиз тадач.
Пара ава инсанарни,
ВетIрен хесет, амал кьунвай.
Эгер бушвал акуртIа ви,
Иви хъвада на акI хуьзвай.
Вун гьинавай жегьил чIавуз?
Къекъвезва зун асани гваз,
Сагъламвал зи хуьда лугьуз.
Сагъламвили лагьана заз:
«Вун гьинавай жегьил чIавуз?»
«Сагъламвал, лагь заз вуна,
Вучиз беден хьанва ажуз?»
«Зун рикIелай алуднай на
Ички пара хъвадай чIавуз!»
«Сагъламвал, акI яргъа жемир,
Вахъ муьгьтеж я йифиз-юкъуз!»
«Вучиз закай фикирначир
ПIапIрусдиз цIай ядай чIавуз?»
Зун са яшдиз акъатайла,
Начагъвилер агатайла,
Сагъламвили лагьана заз:
«Хуьдай ман зун жегьилзамаз!»
Вучиз къе вун пехил я зал?
Вун хьиз зун дидеди хана,
Сад хьиз дуьнья чаз акуна,
Кьведни чун сад хьиз рахана,
Вучиз къе вун пехил я зал?
Зун чуьллера, никIе хьана,
Вун лагьайтIа, кIвале хьана,
Таяризни вине хьана,
Вучиз къе вун пехил я зал?
Залай артух къуллугъ хьана,
КIвале къизил балугъ хьана,
Мецелни ви буйругъ хьана,
Вучиз къе вун пехил я зал?
Заз бубади акьул гана,
Итимвилин лишан гана,
Ваз къуллугъчи халу хьана,
Вучиз къе вун пехил я зал?
Гъавурда ви акьуна зун,
Ви чандава еке зурзун,
Акъваздач ви пехил юзун,
Къаст я ви зун акваз тахьун.
Гада-гуьдуьяр
Садан кьилелай фенва чIар,
Муькуьдан кьил рехи хьанва.
Чеб я лугьуз хци гадаяр,
Дамахдалди физ, къекъвезва.
Хиве кьазвач хьанвай яшар,
Жегьилри хьиз чеб тухузва.
Ичкидин лап хьанва дустар,
Гьар юкъуз икI кеф чIугвазва.
Са куьнкайни фикирзамач,
Кеф чIугун я рикIеллайди.
Хийир-шийир квазни кьазмач,
Сифте ийиз руфун дерди.
Пабни хизан авуна бизар,
Суфрад кьилихъ мад къатканва.
Ички галаз гъваш куьрзеяр,
Пиян хьана, буйругъ гузва.
Дикъетдалди килигайтIа,
Ибруз лугьуз жеч гадаяр.
Чеб тухузвай къайда кьуртIа,
Ибур я гада-гуьдуьяр.
Вуч лугьуда куь амалриз,
Пиян хьана къекъвезвай луьх.
Хъша, гадаяр, куьн дуьз рекьиз,
Ички гадра, сагъламвал хуьх.
Язух ша квез чандин назик,
Гада-гуьдуьвал акъвазра.
Везифа и эциг вилик,
Дуланажагъ куь артухра.
«Лезги газетдин» 2025-йисан 45-нумрадай.
_________________________
«Метлебсуз акъудмир сивяй гьич гафар…»
Гьулдандилай кIеви хьухь!
Кьисметди ваз къалурайтIа
зулумар,
Дустарикай хкатайтIа лап
душманар,
Кьилиз акъат тавуртIани умудар,
Зайиф жемир, гьулдандилай
кIеви хьухь!
Лагь гьамиша вун дагъдилай
кьакьан я,
Ви таярин къуват синтI хьиз
аскIан я,
Незвай фу ваз, хъвазвай ядни
дарман я,
Зайиф жемир, гьулдандилай
кIеви хьухь!
Уьмуьрда гьалтайтIа пара
такIанвилер,
АцалтайтIа вал санбар
туькьуьлвилер,
КичIе хьана, агажмир жуван
вилер,
Зайиф жемир, гьулдандилай
кIеви хьухь!
Метлебсуз акъудмир сивяй гьич
гафар,
Гадармир, кьилиз акъуд гъиле
кьур кар,
Акьулдал на ийиз хьурай дамахар,
Зайиф жемир, гьулдандилай
кIеви хьухь!
ВикIегьвиляй къалур жув тирди
аслан,
РикIелай алудмир бубайрин
макан,
Ватан хуьдай хьур жувакай
къагьриман,
Зайиф жемир, гьулдандилай
кIеви хьухь!
Дидед чIал
Ни лугьуда кесиб я дидед чIал зи,
Вахтарлай амукьдач халкьдин
арада?
Заз чизва, амукьайтIан тек са
лезги,
ЧIал хуьн патал ам вич-вичив
рахада.
Шалбуз дагъдин жив цIрана
куьтягь жедач,
Кьулан вацIун ятар михьиз
кьурадач,
Агъзур йисара хвейи чIал
рекьидач,
Яран сувар къвезмай кьван чIал зи
квахьдач.
Эй зи халкь, лезги стхаяр ва
вахар зи,
Дидед чIал хуьх, ам квадармир
арадай.
Лезги чIал дегиш хьунал жемир
рази,
Хаинвалмир дидед чIалаз, куьн
сагърай!
Зи Шихидхуьр – ПIирер макан
Цуьквед кьунвай къацу чуьллер,
Кьуд патава синер кьакьан.
Авадан хьуй ви мел-мехъер,
Зи Шихидхуьр — ПIирер макан.
Михьи гьава, ятар къайи,
Вун акур кас жеда гьейран.
Кьегьалвилин шартIар хвейи
Зи Шихидхуьр — ПIирер макан
Ви уьруьшрин тамар сагърай,
Безетмиш хьуй багъни бустан.
Куьгьне хуьр я тарих авай
Зи Шихидхуьр — ПIирер макан.
Чапхунчийри вегьейла вал
Надир шагьдин, фендигаран,
Ви эркекри ганай ажал,
Зи Шихидхуьр — ПIирер макан.
Бажарагълу инсанрин кул,
Хуьруьнвийриз я вун масан.
Берекатар хьурай вахъ бул,
Зи Шихидхуьр — ПIирер макан.
ТIвар-ван авай алимрин хуьр,
Мел-мехъерин зурба майдан.
Багъишрай ваз бахтлу уьмуьр,
Зи Шихидхуьр — ПIирер макан.
Бахтлу кас я зун виридлай
Кьисмет хьайи ихьтин ватан.
Лезгистанда гьуьрмет авай
Зи Шихидхуьр — ПIирер макан.
Жанлат бубадиз1
Аялзамаз зегьмет акур
Дяведиз вун акъатна фад.
Вегьенач на, хвена абур,
Душмандиз на кьуна инад.
Имтигьан кьисметди гайи
Жуьрэтдалди на вахкана.
ЦIай кьуна кузвай Ватанни
Чун паталди кIевиз хвена.
Дяведини зегьметди вун
Лап гьулдан хьиз лигимарна.
Зайифвал гьич хиве такьун
Ви тIул тирди малумарна.
Йисар фенва, гзаф я яшар,
Дяведин гел ама рикIе.
На Примоврин тухумдин тар
Лезги багъда хьурна еке.
Уьмуьрдин рехъ дуьз вун фейи
Чаз хьанва насигьат зурба.
Лезги намус пакдиз хвейи
Ваз чухсагъул, Жанлат буба.
__________________
1 Шиир Ватандин ЧIехи дяведин иштиракчи, прокуратурадин органрин ветеран Примов Жанлат Жаватовичаз Гъалибвилин суварин 66 лагьай йис фикирда кьуна бахш авурди я.
Лап чIуру гьал я
Уьмуьр, кьисмет дуьздиз татун,
Руфун тухдиз, кIеве гьатун,
Муг чукIурай ничхир хьиз хьун —
Гьаларкай лап чIуру гьал я!
Фитнедин хар гьакI кьилел къун,
Тахсир квачиз тахсир авун,
Иблис касдин гъиле гьатун —
Гьаларкай лап чIуру гьал я!
Дустуникай душман хкатун,
Балайрикай рикI шад тахьун,
Мукьва-кьили, эл къерех хьун —
Гьаларкай лап чIуру гьал я!
Гьар хъсанвилиз писвал авун,
Чин чуьхуьз, физ, дабан атIун,
Маса гайла хабар тахьун, —
Гьаларкай лап чIуру гьал я!
Дуьз гафар ви батIул авун,
Зегьметдизни къимет тагун,
Эхиз тежер тIалар акун —
Гьаларкай лап чIуру гьал я!
Дубай
Папарин межлисдай хтана,
ДакIуна лап къекъвезва паб.
Къе шуба адаз кIан хьана,
Итимдивайни — рази жаваб.
Итимдин акъудна япай,
Эмиратриз фида лугьуз.
Хизан туна – акуна Дубай,
Кеф чIугуна муьжуьд юкъуз.
Эмиратар, Эмиратар!
Араб уьлкве Эмиратар!
Сагърай шегьер, тIварни Дубай —
Шад я къе паб шуба гьатай!
Дуьз рекье хьухь
Гьафтедавай ирид къакай
Ругуд югъуз дили я вун.
Бизар ийиз халкь сивикай,
Акьул квахьна, гижи я вун.
Кар алакьдач рази жедай,
Ламранбур я къекъуьнарни.
Са затI тадач кIвале недай,
Регъвер хьанва сивикайни.
Зегьмет чIугваз ваз чир хьанач,
РикI ала ви кеф чIугунал.
Диде-буба секин тазвач,
Хъуьрезва вун гьар гафунал.
Ваз гьикI ава ви «гьунарар»
Вирибуру кьабулдай хьиз.
ТIиш-пIуз хьана ивид патар,
Хкведа вун са юкъуз кIвализ.
Жедалда
Заз ван хьайвал, жедалда са вяде
Аламатар инсандиз къалурда.
Яб тагуз эверай, гьатна хъиле,
КIамаян хтулни кIамай жедалда.
АвуртIа лап са туьгьмет чIехида,
Яб тагуз, бишида хьиз тухуда.
И крариз бубайри чи лугьуда,
Бишидан яцни биши жедалда.
КIвалевай кац гатаз, кикIида кцIив,
Экуьниз, няниз са ванцел жеда.
Секинриз жедач, эдебсуз я сив,
Дилидан ламни дили жедалда.
Винелай вич дуьз къалуриз, иблис,
Кьулухъай дабан атIуз эгечIда.
ЧIалахъ тежедай кар туш им
халис,
Иблисдин пабни иблис жедалда.
Санихъ фин тийиз, ацукьна
кIвале,
Дустни-душман а касдал
хъуьреда.
Вердиш хьайидан чIугваз икI
кефер,
Верч гьич, кIекни кваз кьуьртIуь
жедалда.
Женнетдаваз, женнет такваз
Уьмуьрдин гьахъ шартIар такваз,
Хибри хьана къекъвезва вун.
Женнетдаваз, женнет такваз,
Буьркьуь хьана къекъвезва вун.
Гьуьрмет тийиз хайи чилиз,
ЦIиртIер ягъиз къекъвезва вун.
Мейитдин ранг яна чиниз,
Пиян хьана къекъвезва вун.
Диде-буба саймиш тийиз,
КIамаш хьана къекъвезва вун.
Вуч атайтIан жегьил кьилиз,
Гьам хура тваз къекъвезва вун.
Беябурна тухум михьиз,
Тапрукь хьана къекъвезва вун.
ХъуьрейтIан вал дустар михьиз,
Къайгъувачиз къекъвезва вун.
Вахт тахьанваз, хьана куьзуь,
Никьизар яз къекъвезва вун.
Уьмуьрдин рехъ гьакьван гьяркьуь
ГуьтIуьвуна къекъвезва вун.
Аллагьди ваз гайи йисар
Пуч авуна къекъвезва вун.
Амач ваз къе акьван вахтар,
Эхир рекье къекъвезва вун.
И чкаяр гьинай, вун гьинай?
И чкаяр гьинай, вун гьинай?
Вилерин зун чIалахъ жезвач.
Тек садра заз вун акунай,
Мад акунихъ зи вил галач.
Бес хьана заз гьа са вяде
Шадвал авур ви гуьруьшда.
Иблис я вун, тIал тур рикIе,
МасакIа вун гьикI саймишда?
И чкаяр гьинай, вун гьинай?
Зун авай пад мичIи хьуй ваз.
Зи къайгъуда вун ни тунай,
Гьам кицI хьиз хьуй вунни галаз.
КьацIай гел на зи уьмуьрда
Туна, расна чIуру запаб.
Гьар вун акур са легьзеда
РикI тIар жезва, гьатна гъазаб.
И чкаяр гьинай, вун гьинай?
Аквадай вун вилер амач.
ЭверайтIан лап сидкьидай,
Ви суварик мад зун кумач.
Иблис, ви гьа эхир пуч хьуй!
Лазим хьайла, чин чуьхуьз зи,
Зи дуствилел тушиз рази,
КицIинбур хесетар бязи,
Иблис, ви гьа эхир пуч хьуй!
Гьахъ гафуник тахсир кутаз,
Акъудна зи дустар патаз,
Вун акваз, зун жезва саймаз,
Иблис, ви гьа эхир пуч хьуй!
Маймахъ хьана кьурай гъилер,
Къекъвез тахьуй, хана кIвачер,
Буьркьуь хьана иблис вилер,
Иблис, ви гьа эхир пуч хьуй!
На маса гана хъсанвилер,
Чанда туна зурба хъилер,
Икьван авур заз писвилер,
Иблис, ви гьа эхир пуч хьуй!
Ялтах
КIвалахал юлдашрин арада
Къалурда на вун секин кас хьиз.
Бязи вахтара вун аквада,
Дугъриданни, зиян квай кац хьиз.
Явашдиз агатда чIехидав,
Къуллугъ ийиз адаз вун эгечIда.
Са гаф хьайитIани виридав,
Маса гаф лугьуз вун къекъечIда.
Сифтени-сифте кIвалахал вун
Къведа чIехидаз акун патал.
Тадиз фена, адаз салам гун
Къайдайрикай я и ви амал.
Собранидал вун жеда рахаз,
ЧIехидан гафар тестикь ийиз.
Теклиф авур гьар кар хиве кьаз,
Къалурда жув лап зегьметчи хьиз.
КIвалахзавай юлдашрикай на
ЧIехидаз ийида гъибетар.
Хсуси менфят къачуда вуна,
Адаз ийиз хуш суьгьбетар.
ЧIехидалай ийиз на тарифар,
Юлдашрин арада къекъведа.
ЧIехидаз лугьуз ширин гафар,
Адалай вун яр хьиз элкъведа.
КIанз мертеба къуллугъдал къачуз,
Гъиляй къведа ви крар пис алчах.
Юлдашрин крар алахъдай атIуз,
Ихьтин кас я зун рахай ялтах.
Куьрелди…
Гьикьван ягъайтIани рангар,
ЧIулав къамат лацу жедач.
На рушалай ямир чархар,
КIан тахьанмаз ам ваз къведач.
* * *
Герен-герен аватайла,
СтIалди еке къван кьве падда.
Чубандиз лап кIан хьайила,
Кьунакайни ниси хкудда.
* * *
КIваликай кIвал тахьайдаз,
Хуьруькай хуьр жедай туш.
Жуван стха тийижирдаз,
Масадкай дуст жедай туш.
* * *
Ламрал вуч либас на алукIайтIан,
Анкай адан хкатда яргъи япар.
Эгер на атIайтIа япар адан,
Вич лам тирди ванци гуда хабар.
* * *
Маса касдин рехнейрал
Сив ахъайна хъуьремир.
ЦIай аватда ви хизандал,
Ахьтин касдин кьил кьамир.
* * *
ТIебиатдин къанунрай,
ЧIиж цуькверал ацукьда.
КицI кицIел элуькьайла,
Хванахвадиз рехъ жеда.
* * *
Дуьньядин гьалар Аллагьдив гва,
Абурун финиф акъвазриз жедач.
Рушан ихтияр бубадив гва,
Ихтияр авач – гъуьлуьз физ жедач.
«Лезги газетдин» 2026-йисан 11-нумрадай.
