Сагъламвилин къайгъуда

Дагъустандин Гьукуматди медицина­дин идарайрин материально-техни­чес­кий база мягькемарун патал 727 мил­ли­ондилай­ гзаф пулдин такьатар ракъурна­. Идакай здравоохраненидин хиле 2025- йисуз кьиле тухвай кIвалахдин нетижай­риз талукьарнавай махсус мярекатдал РД-дин здравоохраненидин министр Ярос­лав Гла­зова лагьана. Винидихъ къейд­навай макьсад патал РД-дин бюджетда 727,8 миллион фикирда кьунвай.

Чпикай ихтилат физвай пулдин та­кьат­рин гьисабдай агъадихъ галай нетижайрив агакьнава:

— ведомстводик акатзавай 18 идара капитальнидаказ ремонтнава, кIвалахар йисан эхирдалди акьалтIарун пландик кутунва.

— тадаракар къачун патал 400 миллиондилай гзаф такьатар фикирда кьунва, и гьисабдай яз, республикадин кардиологиядин ва рикIинни дамаррин центрадиз рентген-аппарат ва республикадин Вишневскийдин тIварунихъ галай клиникадин азарханадиз операцияр ийидай тадаракар къачунизни;

— Буйнакск шегьердин поликлиника тадаракралди ва мебелдалди таъминаруниз, ведомстводик акатзавай идарайриз котёлдин тадаракар ва генераторар къачуниз, 15 ФАП тадаракралди ва мебелдалди таъминаруниз 38,8 миллион манат ракъурнава.

Чпиз яшайишдин рекьяй тайин кьезил­вилер талукь агьалияр пулсуз дарман­рал­ди таъминаруниз федеральный­ бюджетдин­ гьисабдай 711,4 миллион манат фикирда кьунва. И макьсадриз 2025-йисуз рес­публикадин бюджетдин та­кьатрин гьисабдай 3,1 миллиард манат фикирда кьунва.

Регионда ЛВС-ар (локальные вычис­лительные сети) эцигнава, хвенвай ала­къадин къаналар арадал гъанва, медицинадин документар электронный къайдада туькIуьрзава.

Таъминарун патал

2025-йисан эвел кьилелай инихъ Яша­­йишдин фондунин Дагъустанда авай отделениди инвалидвал авай агьалийриз ТСР (технические средства реабилитации) къачун патал 20,5 агъзурдалай гзаф электронный сертификатар ганва.  Идакай СФР-дин сайтда хабар гузва.

Кьилди къачуртIа, 2025-йисан январдин вацралай инихъ ганвай 20 524 сертификат пулдалди таъминарун патал СФР-дин региональный отделениди затIар къачузвайбурун «МИР» картайриз саки 500 миллион манат пул ракъурнава.

Инвалидвал авай агьалияр ТСР-рал­ди таъминарунин къайда 2025-йиса­лай дегиш хьанва. Гила чпикай ихтилат­ физвай технический такьатар кьве жуьреда­ гузва: гьакъикъи къайдада ва я электронный сертификатдин куьмекдалди. ИкI, чешмеди раижзавай къейдерин гъавурда акьазвайвал, гьакъикъи жуьреда таъминардайла, затIар гунин вахт герек тир шей гьазурун ва я ам агакьарун патал кардик квай государстводин икьрар, гьакIни ана къалурнавай шартIар хьунилай аслу я. Электронный сертификатди ТСР гзаф куьруь муддатда къачудай мумкинвал гузва.

Электронный сертификатдин куьмек­далди чпихъ инвалидвал авай дагъус­тан­вийривай аялрин ва чIехи яшарин агьа­лийрин ортопедический кIвачин къапар, серийный креслояр-коляскаяр, япариз ван атунин аппаратар ва мсб къачуз жеда.

2023-йисалай инихъ сертификатдалди гьакIни заказдалди гьазурнавай протезар ва отрезарни къачуз жезва.

Къейд ийин хьи, идалай вилик гьа и чешмеди раиж авурвал, электронный­ сер­­тификат 10 йикъан муддатда туькIуьр­зава. Ам къуватда амукьунин муддат ла­гьайтIа, са йис я. Кардик квай «МИР» карта аваз хьун электронный сертификат къачунин важиблу шартI я. И кар, маса къачузвай затI къейдзавайла, электронный сертификатдин сагьиб тайинарун ва казначействодай пулдин такьатар метягь маса гузвайдаз ракъурун патал герек я.

ГьакIни ТСР эвез авуниз талукь арза кхьинин дегиш­вилерни къуватда гьатнава. Гила кIва­лахдик квай техникадин­ тадарак ишлемишдай муддат эхирдал къвез ва я ТСР къачун патал чара авунвай такьатрин кьадар куьтягь жез 60 югъ амаз документар вугуз жеда, виликдай­ хьиз, абур ишлемишунин муддат акьалтIайла, — ваъ.

Эгер ТСР 2024-йисан эхирдалди жу­ван­ хсуси пулунихъ къачунваз хьайитIа, и дуьшуьшда СФР-дин региондин отделениди, виликан къайдада хьиз, тадарак къачунвай касди авур харжияр эвез хъийида.

Гьам гьакъикъи жуьреда ва гьамни электронный сертификатдин куьмекдалди ТСР къачун патал арза «Госкъуллугъар» порталда, СФР-дин Дагъустанда авай отделенидин муьштерийриз къуллугъдай чкада ва я МФЦ-да вугуз жеда.

Виликдай винидихъ вичикай ихтилат физвай месэладиз талукь­ малумат гайила, идарадин сайтда агьалийрин фикирдиз­ гъанай: эгер суалар амаз хьайитIа, абу­ру­вай­­ СФР-дин Да­гъус­танда авай отде­­­ле­­нидин «контакт-центрадиз» зенг ийиз­ же­да­­, те­лефондин нумра — 8 (800)100-00-01 (зенг пулсузди я, ислен йикъа­лай хемисдалди сятдин экуьнин 9-далай нянин 6-далди).

Гьазурайди — Муса  Агьмедов