Рекье кьуна
Избербашдин 30 йисан яшда авай агьали, вичин «Volkswagen Polo» машинда аваз «Астрахань — Махачкъала» шегьре рекьяй 7 килограммдин заланвал авай марихуана хкидайла, Махачкъаладин полициядин къуллугъчийри кьуна. Идакай РД-дин МВД-дин пресс-къуллугъди хабар гузва.
Набататдин жуьредин наркотикар избербашвиди багажда авай чархуна чуьнуьхнавай. Дуьздал акъудай марихуана полицейскийри вахчуна. Шак физвайди РФ-дин УПК-дин 91-статьядай кьунва.
Тайинарайвал, жегьилди марихуана къуншидаллай республикадай хкизвай, адаз ам Дагъустанда маса гудай къаст авай. РФ-дин УК-дин 228-статьядин 2-паюна къалурнавай тахсиркарвилин лишанрай уголовный дело къарагъарнава.
Ноутбук чуьнуьхна
Махачкъаладин агьалиди таксидай 70 агъзур манатдин къиметдик квай ноутбук чуьнуьхна.
Полициядин къуллугъчийри шак физвайди кьуна ва отделдиз хкана. Ам 38 йисан яшда авай махачкъалави я. Ихтилат авурвал, таксида маса пассажирди рикIелай алатна тур ноутбук ада вахчуна ва са туьквендиз 18 агъзур манатдай маса хгана. Хьайи пул ада вичиз кIандайвал серфна.
Полициядин къуллугъчийри ноутбук маса гайи туьквен тайинарна ва ам элкъвена вахчуна. Ноутбук адан иесидив — 18 йисан яшда авай Махачкъаладин агьалидив — вахкана.
«Лезги газет»
