Болгарияда армрестлингдай кьиле фейи дуьньядин чемпионатда дагъустанвийрикай ана иштиракай ва кIвенкIвечи чкаяр къазанмишай пуд спортсменни чи миллетдин векилар я. ИкI, Аким Гьамзатов — къизилдин, Рудин Селимханов ва Равиль Тагьирбегов буьруьнждин медалриз лайихлу хьана.
Чи ватанэгьлийрихъ пудахъни спортда икьван гагьдини хъсан нетижаяр хьана, абур уьлкведин кIвенкIвечивал патал акъажунрин ва чемпионатрин, жуьреба-жуьре акъажунрин гъалибчияр я. Мегьарамдхуьруьн райондин Къличханрин хуьряй тир Аким Гьамзатова дуьньядин кесерлу майданда гила кьвед лагьай сеферда чемпионвилин тIвар къазанмишнава.
Спортсменар гьазурайди армрестлингдай Россиядин спортдин лайихлу мастер, Россиядин лайихлу тренер, дуьньядин ва Россиядин чемпион Малик Тагьирбегов я.
***
Дербентда дзюдодай Россиядин Кубок патал зайифдаказ ван къвезвай спортсменрин арада кьиле фейи акъажунра, санлай къачурла, 12 медаль къазанмишуналди, Дагъустандин хкянавай команда 1-чкадиз лайихлу хьана. Башкириядин хкянавай командади — 2, Челябинскдин командади — 3-чкаяр кьуна.
ИкI, къизилдин медалриз — Россиядин Кубокриз лайихлу хьайи 6 спортсмендин арада чи кьве ватанэгьли ава: 66 кг-дин заланвал авайбурун арада Назим Сайидов (тренер — Садир Айвазов) ва 73 кг-дин заланвал авайбурун арада Рамалдан Магьарамов (тренер — Тельман Къурбанов).
Спортдин кесерлу майданра абуру чпин устадвал икьван гагьдини садрани кьведра къалурнавач. ИкI, Мегьарамдхуьряй тир Н. Сайидова зайифдаказ ван къвезвайбурун арада 2021-йисузни дзюдодай дуьньядин чемпионвилин тIвар къазанмишна. Вичин ери-бине СтIал Сулейманан райондин Кьулан СтIалдилай тир Р. Магьарамов кесерлу хейлин турниррин гъалибчи, призер, Башкирияда кьиле фейи Гатун Сурдлимпиададин (зайифдаказ ван къвезвай спортсменрин арада) къугъунра самбодай буьруьнждин медалдин сагьиб я.
***
Каспийскда, Али Алиеван тIварунихъ галай спортдин имаратда, джиу-джитсудай жаванрин арада Дагъустандин кIвенкIвечивал патал акъажунар ва чемпионат кьиле фена. Республикадин районрайни шегьеррай атанвай гзаф кьадар спортсменри тамам 3 юкъуз чпин устадвал къалурна. Гъалибчийрин арада Мегьарамдхуьруьн райондин ЦIийи Гъепцегьрин ва КьепIир-Къазмайрин хуьрера тренер-муаллим, джиу-джитсудай дуьньядин са шумудра чемпион Эйнар Экберов ва адан гъилик чпин устадвал хкажзавай жаванар ава.
ИкI, республикадин кIвенкIвечивал патал акъажунра Э. Экберован гъилик устадвал хкажзавай Абдулхаликь Садыкьова (2013-2014-йисара дидедиз хьайибурун, 66 кг-дин заланвал авайбурун арада) — 1, Ислам Айдунбегова (2013-2014-йисара дидедиз хьайибурун, 38 кг-дин заланвал авайбурун арада), Къазиагьмед Гьажиева (2009-2010-йисара дидедиз хьайибурун, 81 кг-дин заланвал авайбурун арада), Имам Селимханова (2013-2014-йисара дидедиз хьайибурун, 42 кг-дин заланвал авайбурун арада) ва Ренат Нурагьмедова (2009-2010-йисара дидедиз хьайибурун, 60 кг-дин заланвал авайбурун арада) 3-чкаяр кьуна.
Республикадин чемпионатда Эйнар Экберова (69 кг) — 2 ва Эрзиман Лачинова (77 кг) 3-чкаяр кьуна.
Гила Э. Экберова ва А. Садыкьова СКФО-дин чемпионатдиз ва кIвенкIвечивал патал акъажунриз гьазурвал аквада.
Рагнеда Рамалданова
