Алай девир телефон, интернет, соцсетар ва мессенджерар галачиз фикирдиз гъиз хьун четин кар я. Девирдин ихьтин къулайвилер авачирла, уьмуьр четиндаз элкъвезва. Ахцегь райондин Къурукални икьван гагьди алакъа авачир хуьрерик акатзавай. Кьиблепатан Дагъустандин машгьур чкайрикай сад тир кузвай ятарин чешме — «Ахцегьрин гьамамар» санаторий — авай и макандин уьмуьрдани мукьвара лишанлу вакъиа кьиле фена: МТС-ди и хуьр вичин сетдик кутуна.
Хуьруьнвияр хьиз, и кардал гьамамрал къвезвай туристарни пара шад я. ГьикI хьи, женнетдин пипIез ухшар, цIи, ремонтарни хъувуна, мадни гуьзел хьанвай инаг акурла, гьейран жезвай абуруз гила чпин гьиссерикай гьасятда яргъариз хабар гудай мумкинвал хьанва.
Гьа са вахтунда уьмуьр анжах са шад вакъиайрикай ибарат туш эхир. Хуьруьнвийриз, «Тади куьмек», маса къуллугъар герек атайла, зенгдай мумкинвал авачиз кар кIеве гьатзавай. Гила а вахтар алатнавайдак умуд кутазва и хуьруьнвийри, гьакI мугьманрини. Хуьруьн гьар са чкадилай гила гьам «Госкъуллугъар» порталдикай, гьам онлайн-банкарикай, гьам соцсетрикай — девирдин къулайвилерикай менфят къачуз жезва.
— Кьиблепатан Дагъустанда алакъа, и хел вилик тухун чи компания патал кьетIен кIвалах я. Ихьтин мишекъат шартIар авай, гьа са вахтунда акьалтIай гуьрчег пипIер тир гъвечIи гзаф кьадар хуьрер чун алакьдайвал алакъадал эцигиз чалишмиш жезва. Ингье са шумуд йис я чна гзаф четин тир чкайрани — дагъдин кьакьан хуьр тир Къурушдал, Гарагъиз, гила Къурукалазни алакъа гъанва. Вилик мадни чIехи планар ква, Кьиблепатан Дагъустанда алакъа мадни гегьеншардайвал я, — къейдна Дагъустанда МТС-дин директор Карема Изиевади.
«Лезги газет»
