Пул авай киседал темягь фена
Мукьвара Махачкъаладин полициядин къуллугъчийри тайинарайвал, Къарабудахкент райондин 53 йисан яшда авай агьалиди, туьквенда аваз, дезгедал алай кисе чуьнуьхна. Киседа 36150 манат пул авай. Идакай чаз республикадин МВД-дин пресс-къуллугъди хабар гана.
Полицейскийри тайинарайвал, недай суьрсетрин туьквендиз гьахьайла, шак физвайдаз иниз атай маса касди рикIелай алатна тунвай кисе акуна ва ам вичиз вахчуна. Са куьруь вахтни алатнач, шак физвай итим къайдаяр хуьдай органрин къуллугъчийри кьуна. Пул авай кисе адан иесидив — 65 йисан яшда авай махачкъалавидив — вахкана.
Амма киседа пул вири амачир. Чуьнуьхайда пулуникай са тIимил ички ва бананар къачуниз серфнавай.
Тахсиркарвилин лишанриз килигна, РФ-дин УК-дин 158-статьядин 2-паюнай (угъривал) уголовный дело къарагъарнава.
Гьафтедин аварияр
8-сентябрдилай 14-сентябрдалди Дагъустандин мулкарал улакьрихъ галаз алакъалу 26 авария хьана. ЧIуру агьвалатрин нетижада 6 кас кьена ва 29 касдал (абурукай 4 аял я) жуьреба-жуьре хирер хьана.
ДТП-яр тахьун патал РД-дин МВД-дин госавтоинспекциядин къуллугъчийри рекьера машинар гьалзавай дагъустанвийриз, мугьманриз къайдайрал амал авуниз эвер гузва.
«Лезги газет»
