Уллу-Гъетягърин хуьр СтIал Сулейманан райондин центр тир Кьасумхуьруьвай 9 километрдин яргъа экIя хьанва. Махачкъала шегьердинни и хуьруьн арада 196 километрдин, виридалайни мукьвал алай шегьер тир Дербентдиз кьван 69 километрдин мензил ава.
Пешекаррин фикирдалди, Уллу-Гъетягърин хуьр «уллу» (чIехи, кьилин) ва «гъед» гафарикай арадал атанва. Амма хуьр вич арадал атай вахт малум туш.
Хуьруьвай 3-4 километрдин рагъэкъечIдай патахъ Уллу-Гъетягърин куьгьне сурар (археологиядин памятник) гала. Хуьруьн къваларив гвай мулкарал са мус ятIани хьайи куьгьне хуьрерни дуьздал акъатна.
Хуьруьн кефер патан къерехда тухумрин куьгьне сурар ава. Жемят са шумуд тухумдикай ибарат я: ЧкIаяр, Къанбацар, Къаргъаяр, СикIер, Юркъулияр, Пилтияр.
Чкадин агьалияр вилик вахтара асул гьисабдай малдарвилел, багъманчивилел ва хуьруьн майишатдин маса хилерал машгъул хьана. Кеспи авун патал шегьерризни физвай.
1886-йисан переписдин делилралди, хуьре 121 майишат ва 581 агьали (304 итим ва 277 дишегьли) авай.
Чи йикъара хуьре 199 кIвал ава, 601 кас яшамиш жезва. Уллу-Гъетягъ администрациядин центр я, адак маса хуьрерни акатзава.
Алай вахтунда чкадин агьалийрин дуланажагъ мал-хеб, къушар хуьнихъ галаз алакъалу я: ина 230-далай виниз хсуси майишатар кардик ква.
Мурад Мегьамедкеримован «СтIал Сулейманан район: тарихдин гелерай» ктабдай.
