15-сентябрдилай Россиядин журналистрин союзди Сочи шегьерда кьиле тухузвай гегьенш мярекатда — алай аямдин журналистикадин «Вири Россия — 2025» ХХIХ форумда — хейлин регионрай журналистри иштиракзава. Дагъустандин журналистрин дестедик республикадин информациядинни печатдин агентстводин регьбер А. Юсупов, адан куьмекчи М. Мегьамедкеримов, РФ-дин журналистрин союздин Дагъустандин отделенидин председатель, «Лезги газетдин» кьилин редактор М. Ибрагьимов, «Дагъустан» этномедиахолдингдин регьбер А. Магьамаев ва масабур ква.
Дагъустандин журналистрин стенд фикир желбзавайди хьанва. Ам Ватан хуьзвайдан йисаз талукьарнава, гьакI республикадин журналистрин мультимедиадин проектрихъ галазни таниш жедай мумкинвал ава.
М. Ибрагьимова къейд авурвал, ихьтин форумра иштиракуни неинки агалкьунар къалурдай, гьакIни чара-чара регионра кIвалахзавай журналистри сада-садан тежриба чирдай мумкинвални гузва.
Форумдин кIвалах 21-сентябрдалди давам жеда.
«Лезги газет»
