Къиметрин гьакъиндай

Республикадин алишверишдин центрайра ва базарра салан майвайрин къиметар ужуз жезвайди виле акьазва. Идакай «РГВК»-дин телеграм-каналди раижзава.

Чешмеди къейдзавайвал, алай йисан бегьер себеб яз, картуфар, чугъундурар, чичIекар ва помидорар юкьван гьисабдалди 10-25 процентдин ужуз хьанва. Августдин варз патал ибур тIебии гьалар я.

Аграрийри 20 агъзур гектардин майданрай гьеле 615 агъзур тонн салан майваяр кIватI хъувунва. Идалайни алава, РД-дин хуьруьн майишатдин ва недай суьрсетдин министерстводин делилралди, фермерри 145 агъзур тонн картуфрин бегьер къачунва.

Къейдзавайвал, бегьер кIватI хъувунал гьалтайла, кIвенкIвечи чкайрал ала: Дербентдин, Мегьарамдхуьруьн, Хасавюрт районар.

Салан майваяр гьасилунал гьалтайла, кар алай муниципалитетар тир Акуша ва Леваши районра. Сентябрдин эхирра келемар кIватI хъувунив эгечIда.

Аграрный ведомстводин виликамаз кьунвай гьисабралди, хуьруьн майишатдин суьрсет гьасилунал машгъулбуру цIи миллионни зур тонндив агакьна салан майваяр кIватI хъийида.

Агьалийриз хабар гузва

«Дагэнерго» филиалдин Сад тир кон­такт-центрдин официальный канал вахтуналди блокироватунихъ галаз ала­къа­лу яз, РД-дин энергетикадин ва тарифрин министерстводи электроэнергиядалди таъминаруниз талукь суалрай оперативный алакъа хьун патал кардик квай контактрикай хабар гузва. Идакай и ведомстводин телеграм-каналди кхьизва.

ИкI, электроэнергиядалди таъминарунихъ галаз алакъалу справочный информация, меслятар ва суалар тади гьалда гьялун патал агьалийривай «Даг­энерго» — «Россети Северный Кавказ» филиалдин Контакт-центрадин Сад тир нумрадиз зенг ийиз (8-800-220-0-220, зенг пулсузди я), гьакIни официальный Telegram-каналдикай менфят къачуз жеда — https://t.me/EKC DAGENERGO.

РД-дин тарифрин ва энергетикадин министерстводи республикадин агьалияр хкатунар авачиз энергиядалди таъминарунин месэлаяр датIана гуьзчивилик кутунва, арадал къвезвай вири гьалар тади гьалда гьялун патал сетдин компанийрихъ галаз алакъа хуьзва.

2,5 сефердилай гзаф

Дагъустанда селлерикай хуьниз талукь мярекатар пулдин такьатралди таъминарунин кьадар 2026-йис патал 2,5 сефердилай гзаф артухарнава. Идакай РД-дин тIебиатдин ресурсрин ва экологиядин министерстводин телеграм-каналди хабар гузва.

Пулдин такьатар артухаруни селлерикай, ятар алахьуникай хуьдай мумкинвал гуда.  — Сифте нубатда — алатай йисара, къвалар къуникди кIвалер ва инфраструктура цик акатун себеб яз, ЧС-дин режим кардик кутур агьалияр яшамиш жезвай чкайра.

Сагъламвилин къайгъуда

Дагъустандин здравоохраненидин­ ми­нистерстводи Мегьарамдхуьре­ цIийи поликлиника эцигун патал тек­лиф ра­къур­нава. Идакай ведомстводин телеграм-каналди хабар гузва. Чешмеди къейдзавайвал, милли проект себеб яз, мукьвара Мегьарамдхуьре цIийи поликлиника хьун мумкин я.

«Продолжительная и активная жизнь» милли проект­дик акатзавай здравоохраненидин сифтегьан куьмек агакьардай чкаяр цIийи къайдада туькIуьр хъувунин программадин сергьяра аваз, хуьрерин здравоохраненидин гзаф объектар эцигун ва капитальнидаказ туькIуьр хъувун пландик кутунва.

Мегьарамдхуьруьн поликлиника куьгьне дараматда ава. Куьгьне щитрикай кIватIнавай ам ремонт ийиз хъжедач. Къейдзавайвал, медицинадин куьмек агакьурунин шартIар гьам начагъ агьалияр патал, гьамни медкъуллугъчияр патал къулайсузбур я.

Дагъустандин здравоохраненидин ми­­нистерстводи, «Продолжительная и ак­тивная жизнь» милли проектдин сергьятра аваз, меслятун патал РФ-дин здравоохраненидин министерстводиз алай девирдин цIийи поликлиника эцигунин проект ракъурнава. Разивилин къарар кьабулайтIа, цIийи поликлиникадикай­ неинки Мегьарамдхуьруьн, гьакIни анин мулкара авай Кьурагь, Ахцегь ва Хив районрин кьуд хуьруьн агьалийрини менфят къачуда.

Гьазурайди — Муса  Агьмедов