9-сентябрдиз РД-дин Гьукуматдин Председатель Абдулмуслим Абдулмуслимован регьбервилик кваз муниципалитетрин сечкийриз гьазурвал акунин месэлайриз талукьарнавай заседание кьиле фена.
Чна виликдай газетдай хабар гайивал, сесер гун республикада 12-14-сентябрдиз кьиле фида, Махачкъала, Буйнакск, Дагестанские Огни, Каспийск, Къизляр, Южно-Сухокумск шегьеррани 38 районда сечкийрин участокар ачух жеда.
«Кар алай месэлайрикай сад сесер гудай йикъара сечкийрин участокар кардик кутадай идараяр электричестводалди, алакъадалди таъминарун, медицинадин ва МЧС-дин къуллугъар датIана кардик кваз хьун я. Гьар са муниципалитетда жавабдар ксар (кураторар) тайинарнава, абуру и месэлаяр кьетIен гуьзчивилик кутуна кIанда», — къейдна А. Абдулмуслимова.
Заседанидал веревирдзавай месэлайрин гьакъиндай чпин фикирар РД-дин Кьилин ва Гьукуматдин Администрациядин руководителдин сад лагьай заместитель Али Ибрагьимова, энергетикадин ва тарифрин министр Марат Шихалиева, образованидин ва илимдин министрдин сад лагьай заместитель Аида Далгатовади ва масабуру лагьана.
Гегьеншдиз РД-дин Гьукуматдин сайтдай кIелиз жеда.
Чи мухбир
