Аял хьайидалай кьулухъ садра гузвай пулунин такьатар, къазанжидин дережадилай, диде-бубайрин кIвалахрилай аслу тушиз, вири хизанриз талукь я.

Алай йисан 1-февралдилай и пу­лунин такьатрин кьадар 26 900 манатдикай ибарат я. Эгер диде-бубади кIва­лах­­заватIа, аялдиз­ талукь пособие абурукай садавай­ вичин кIвачихъ къа­чуз­ жеда. Эгер ди­де-бубадикай сада­ кIва­лахзавачтIа, абу­рукай анжах кIвалах­­­завайдаз тайи­на­риз жеда. Россия­­дин­ яша­йиш­дин фон­­­дуни­, ЗАГС-ди аял хьанвайвилин гьакъиндай­ малумат ­ра­­къу­рай­далай кьулухъ кIвалах­завай диде-бубадиз арза галачиз пул тайинарзава.

Бес диде-бубади садани кIвалах тийиз хьайитIа, гьа дуьшуьшда аялдиз талукь пул низ ва гьикI тайинарзава? Ихьтин суал чна РД-дин кьилин МФЦ-дин идарадин пешекарриз гана.

Малум хьайивал, кIвалах тийизвай диде-бубайривай тIвар кьунвай посо­бие туькIуьрун па­тал­ МФЦ-дин идарада, гьакIни «Гос­къуллу­гъар» порталдин куь­мек­дал­ди ва я Рос­сиядин яшайишдин фондуна арза вугуз жеда.

Арза аял хьайи­далай кьулухъ 6 вацран къене вугун герек я. МФЦ-да и арза вугуз хьайитIа, ихьтин документар герек жеда:

—диде-бубайрин паспортар;

—аял хьайивилин гьакъиндай шагьадатнама;

—эвленмиш хьайивилин (чара хьайи­вилин) гьакъиндай шагьадатнама, бубавал тайинарнавайвилин гьакъиндай шагьадатнама;

—аял хьунин гьакъиндай справка;

—банкунин реквизитар (диде-бу­ба­дикай пособие нин кIвачихъ туькIуьр­за­ватIа, гьаданбур);

—хизанда авай вирибурун СНИЛС-ар.