Махсус серенжемдикай

РФ-дин аскерри ЛНР-дин Кремендин тамара, жен­гера агалкьунар къазанмишуналди, Украинадин яракьлу къуватрин кIеретIар элкъуьрна кьаз башламишнава. Военный пешекар А. Марочкодин гафаралди, ВСУ-дин аскерри чеб хушуналди есирвиле вугузва. Идакай «ТАСС» чешмеди хабар гузва.

Идалай вилик пешекарди эхиримжи кьве юкъуз Россиядин аскерар Кремендин тама хейлин вилик фейидакай ва а чкадин 10 гектар кьван мулкар гуьзчивилик кутурдакай хабар ганай.

29-июлдиз «РИА Новости» чешмеди хабар гайи­вал, йифен вахтунда ВСУ-ди Россиядин регионрал ахъаяй 74 дрон ПВО-дин такьатри тергна. Кьилди къа­чуртIа, — Брянскдин, Ростовдин, Калугадин, Смоленск­дин, Ленинграддин областрин мулкарин кьилел. Украинадин беспилотникрин гьужумдиз жаваб гун яз, Россиядин кьушунри вини дережадин дуьм-дуьз яракьралди цава, це ва чилел ягъунар кьазва. ГьакIни душмандин­ военный объектар беспилотникрин куьмекдалди язава.

РФ-дин оборонадин министерстводи 28-июлдиз малумарай делилралди, махсус серенжем кьиле тухунив эгечIайдалай инихъ Россиядин Яракьлу Къуватри Украинадин 664 самолет ва 283 вертолет, зенитный ракетайрин 624 комплекс, пилот галачиз лув гудай 73153 аппарат, 24363 танк ва дяведин маса машинар, РСЗО-дин 1581 машин, артиллериядин ва маса 27929 яракь, военный махсус 38813 автомашин тергна.

Абурун месэла туш

Россиядин хатасузвилин советдин кьилин замес­титель Д. Медведева Америкадин сенатордиз Украинадихъ галаз кьиле тухудай рахунрик экечI тавун ва вичин уьлкве патал кIвалахун теклифна. Ада «Х» соцсетда кхьенвай гафар «РИА Новости» чешмеди гъизва­.

Медведева алава хъувурвал, рахунар кьиле тухун патал столдихъ мус ацукьун лазим ятIа, я Трампа­, я се­наторди гьялзавай месэла туш. «Чна тухузвай дяведин серенжемдин вири макьсадар кьилиз акъатайдалай кьулухъ рахунар акьалтIда. Сифте нубатда­ Аме­ри­ка патал кIвалаха, кьуьзекар», — кхьенва Д. Мед­ве­де­ва америкави сенатордизни президентдиз талукь яз.

Идалай вилик Медведева кьазвай гьар са гьелягь дяве авун патал къачузвай кам тирди рикIелай алуд тавун патал США-дин президент Трампаз эвер ганай.

РикIел хкин, 14-июлдиз Д. Трампа Москвадиз ислягьвилин икьрар кутIунун патал 50 йикъан муддат ганай. Вичин истемишун гьисаба такьуртIа, мадни акси серенжемар кардик кутада лугьуз, ада гьелягьар кьунай. 28-июлдиз ада идалай вилик вичи тайинарай 50 йикъан муддат 10-12 йикъал кьван куьруь хъийизва лагьана малумарна. Гьа са вахтунда ада, эгер Украинадин гьакъиндай икьрар кутIунунин месэладал кIукI татайтIа, Россиядихъ галаз амадагвилин алакъаяр авай уьлквейриз акси яз кьвед лагьай санкцияр, пош­линаяр кардик кутун хиве кьазва.

Меслятдал атана

Таиланд ва Камбоджа сада-садаз гуьлле гунин женгер акъвазарун патал икьрар кутIунайдалай кьулухъ уьлквейрин часпаррив гзаф кьадар аскерар агуд тавунин меслятдал атана. «РИА Новости» чешмеди хабар гузвайвал, ихьтин фикир Камбоджадин парламентдин депутат Л. Менгура малумарна. Адан фикирдалди, женгер акъвазарунал маса уьлквейрин векилри гуьзчивал тухун важиблу я.

Къейд ийин, Таиланддинни Камбоджадин часпардал къалмакъал 24-июлдин экуьнахъ гатIуннай. Час­пардин патав сада-садаз гуьлле гана. Камбоджади гуьгъуьнлай саналди цIай гудай «Град» ишлемишна, гьа жергедай яз яшайишдин объектарни яна. Жаваб яз, Таиландди Камбоджадин яракьлу къуватриз авиациядин ягъунар кьуна. Кьве патани кьейибур, хирер хьайибур ава, гьакI ислягь агьалийрин арадани.

Нагьакьан судурар

гьакьан судурарГерманиядин конституциядин ва аслу туширвилин рекьяй советдин кьил Р. Нимайеран фикирдалди, Украинадиз Германиядай ПВО-дин «Patriot» системаяр агакьаруни уьлкве патал нагьакьан судурар арадал гъун мумкин я. Адан гафар «РИА Новости» чешмеди раижнава.

«И карди Германия неинки военный макьсаддиз элкъуьрда, гьакIни чи экономикадиз, ватандашриз, налогар гузвайбуруз зиянар гуда», — лагьанва сиясатчиди.

Адан фикирдалди, пулунин такьатар Германияда мектебар, рекьер ва муькъвер патал ахъаюнин игьтияж ава. «Эгер яракьар патал такьатар серфайтIа, чун мадни кесиб жеда», — алава хъувуна ада.

Гьазурайди — К.Ферзалиев