Ватан хуьзвайбурун йис
ЧIехи Гъалибвилин 80 йисан юбилей къейдзавай йикъара Птидхуьре ва ЦIийи Испика СВО-да игитвилелди телеф хьайи Нуралиев Райфудин Сейфудиновичаз, Бабаев Гьашим Абубакаровичаз ва Абдусаламов Жанали Валериковичаз абуру кIелай школайра мемориалдин кьулар ачухуниз талукьарнавай мярекатар кьиле фена.
Нуралиев Райфудин 1981-йисан 30-мартдиз Туьркменистандин Небит-Дагъ шегьерда дидедиз хьана. 1995-йисуз Нуралиеврин хизан Птидхуьруьз хтана, Райфудина 1998-йисуз Уллу-Гъетягърин юкьван школа акьалтIарна.
1999-йисан ноябрдиз Р. Нуралиеваз Россиядин Яракьлу Къуватрин жергейриз эвер гана. Армиядай хтайдалай гуьгъуьниз ада «Дагюгстрой» ОАО-да (Дербент), МАРМИТЭКС ООО-да (Сургут), «Нефтьмонтаж» ООО-да (Ханты-Мансийск) кIвалахна.
2022-йисан октябрдилай Р. Нуралиева СВО-дин зонада иштиракна. 2023-йисан 18-июлдиз Запорожьедин областдин Работино поселокдин патарив кьиле фейи женгина мотострелковый полкунин пулеметчик Р. Нуралиев игитвилелди телеф хьана.
РФ-дин Президентдин Указдалди кьегьал хциз «Жуьрэтлувиляй» орден гана. Ам Птидхуьре кучукнава.
Бабаев Гьашим 2000-йисан 20-июлдиз Астрахань шегьерда дидедиз хьана. Ада Испикрин юкьван школа, Астрахандин агротехнический техникум акьалтIарна, 2020-йисан ноябрдилай Наро-Фоминск шегьерда армиядин жергейра къуллугъна.
2024-йисан мартдилай ефрейтор Гь. Бабаева Херсондин ва Запорожьедин областра, Луганскдин ва Донецкдин республикайра кьиле тухвай женгера иштиракна.
Дагъвидиз хас тирвал, Гь. Бабаева командованидин тапшуругъар уьтквемвилелди кьилиз акъудна, са шумуд женгина душмандиз къати ягъунар кьуна. Гьашима женгинин майдандилай хирер хьанвай чи аскерар саламат чкадиз ахкъудна.
СВО-да къалурай кьегьалвилерай РФ-дин Президентдин Указдалди Гь. Бабаеваз (кьейидалай кьулухъ) «Жуьрэтлувиляй» орден гана.
Абдусаламов Жанали 1983-йисан 29-январдиз Испикрин хуьре дидедиз хьана. Школа акьалтIарайдалай гуьгъуьниз ада армиядин жергейра къуллугъна.
2024-йисан майдилай Донецкдин Республикада СВО-да иштиракна. Женгинин махсус тапшуругъ тамамардайла, 2024-йисан 15-июндиз игитвилелди телеф хьана.
Россиядин Президентдин Указдалди Жанали Абдусаламоваз «Жуьрэтлувиляй» орден гана.
… Лугьуда хьи, лекьре цава чан гуда, игитди — женгина. Чна винидихъ тIварар кьур Райфудин Нуралиева, Гьашим Бабаева ва Жанали Абдусаламовани, халис ватанпересвал къалуруналди, женгера чпин чанар къурбандна. Абурун тIварар Ватандин тарихда, инсанрин рикIера эбеди яз амукьда.
Хазран Кьасумов
