12-апрелдиз Хасавюрт райондин Къурушрин хуьре яшамиш жезвай агъсакъал, хуьруьн чешнелу агьали, зегьметдин ветеран Хаспулатов Къубат Адилович рагьметдиз фена лагьай чIулав хабар агакьна.

Къ. А. Хаспулатов 1932-йисуз Ахцегь райондин Игъиррин­ хуьре машгьур хипехъандин еке хизанда дуьньядал атана. Советрин Союздин Яракьлу къуватра кьуд йисуз вичин буржи намуслудаказ тамамарна хтай Къубат Адиловича, хуьр Хасавюрт райондиз куьч хьайилани, зегьмет чIугун давамарна.

Саки 70 йисуз ада майишатда вичин агалкьунарни алакьунар къалурна. Хайи хуьре­, районда, майишатда элдин тIвар­цIел баркалла гъайи ва гьуьр­мет къазанмишай кас тир Къубат Адилович.

«Зегьметдин ветеран», «В.И. Ленинан 100 йис», «Зегьметдин зарбачи», «ЧIехи Гъалибвилин 70, 75 йис», «Социализмдин акъажунра гъалибчи» медалри, РФ-дин Президент В.В. Пу­тинан къул алаз ганвай тебрикдин чарчи, гьуьрметдин грамотайри, пулдин премийри ва цIудралди маса шабагьри ам гьакъисагъ зегьметкеш хьайивилин гьакъиндай шагьидвалзава.

Къ. Хаспулатов хуьруьн краривай садрани къерех жедачир, жегьилрин арада тербия­дин, адалатлувилин, диндин кIва­лахар тешкилдай, хуьре къайда, низам хуьниз эвер гудай.

Къубат бубадини адан уьмуьр­дин юлдаш Мансура бадеди чешнелу хизан арадал гъана, ругуд веледдиз тербия гана, абур рикIера авай мурадрив агакьарна.

Къурушдал яшамиш жезвай бажанах Къазиев Гьажи муаллимдин хизанди рагьметлудан стха Хидир Адиловичаз, хизандиз, мукьва-кьилийриз ва вири багърийриз башсагълугъвал гузва. Аллагьди рагьметрай вичиз!