Мукьвара хейлин йисара акьалтзавай несилриз дерин чирвилер гайи муаллим, хъсан инсан, къайгъудар диде Жейриба Мегьамедовна Аллагьвердиева рагьметдиз фена.
Ам 1941-йисан 21-октябрдиз Хив райондин АрхитIрин хуьре дидедиз хьана. Дагъустандин госпединститутдин физикадинни математикадин факультет акьалтIарай 1964-йисалай ада муаллимвиле зегьмет чIугуна. 2005-2019-йисара АрхитIрин юкьван мектебда психологдин везифаярни тамамарна.
Бегьерлудаказ зегьмет чIугунай тежрибалу муаллимдиз жуьреба-жуьре шабагьар гана. 1996-йисуз ам «Зегьметдин ветеран» медалдиз, 2008-йисуз «РД-дин лайихлу муаллим» тIварцIиз лайихлу хьана. Гьакъисагъ зегьметдай адаз мектебдин, райадминистрациядин, РСФСР-дин просвещенидин министерстводин ва РСФСР-дин илимдин идарайрин, высший школайрин, просвещенидин хиле кIвалахзавай работникрин республикада кардик квай комитетдин патай гьуьрметдин грамотаяр гана.
Девирар къвез алатда. Амма вири уьмуьр аялриз чирвилер гуниз бахш авур, чIехи гьуьрмет къазанмишай муаллимрин тIварар несилрин рикIера яргъалди амукьда. Жейриба Мегьамедовна Аллагьвердиевани гьахьтин муаллимрикай тир. Къуй адан мукьвабурун рикIериз Аллагьди сабур гурай.
Чи мухбир
