564 миллион ­манатдилай гзаф

Дагъустанди медицинадин идарайрин кьабулдай отделенияр цIийикIа туьх­кIуьрун патал 564 миллион манатдилай гзаф пулдин такьатар къачуда. Идакай «Дагъустан» РИА-ди хабар гузва.

Кьилди къачуртIа, чешмеди, кабминдал асаслу яз, раижзавайвал, РФ-дин премьер-министр Михаил Мишустина ре­гионриз винидихъ къалурнавай макьсадар патал 11,4 миллиард манатдилай­ гзаф пулдин такьатар чара авунин гьа­­къин­дай буйругъдал (распоряжение) къул чIугунва.

Къейдзавайвал, пулдин такьатар медицинадин идарайрин кьабулдай отделенияр цIийикIа туькIуьр хъувунин игьтияж авайдакай раиж авур 21 региондиз рекье твада. А регионрин арадай яз, кьилди къачуртIа, Дагъустандини, винидихъ къейднавайвал, и макьсадар патал 564 миллион манатдилай гзаф пулдин такьатар къачуда.

Пулдин такьатар гьакIни Алтай Рес­пуб­ликади, Кабардино-Балкарияди, Ка­ра­­чаево-Черкесияди, Ставрополдин крайди, Белгороддин, Курскдин, Ростовдин, Смоленскдин областри ва маса регионри къачуда.

РФ-дин гьукуматдин сайтда раижзавайвал, винидихъ чпикай ихтилат физвай пулдин такьатрин гьисабдай са бязи азарханайрин кьабулдай отделенийрин къурулушда уьмуьр хаталувилик квай ксариз тади гьалда медицинадин куьмек агакьарун патал модулдин конструкцияр пайда жеда. Идалайни алава яз, бюджетдин такьатар медицинадин идарайрин кьабулдай отделенияр жуьреба-жуьре медтехникадалди тадаракламишун патал ракъурун пландик кутунва.

Артух хьанва

2024-йисуз Дагъустанда интернет-алишверишдин кьадар 12 процентдин артух хьанва. Идакай, РД-дин промышленностдин ва алишверишдин министр Низам Халилован гафарал асаслу яз, «Дагъустандин экономика» телеграм-каналди хабар гузва.

Адан гафаралди, 2023-йисуз и ре­къем 28 миллиард манатдикай ибарат тир 2024-йисуз лагьайтIа, рекъем 31,3 миллиард манатдал кьван хкаж хьана.

Гьа са вахтунда чешмеди хабар гузвайвал, алай вахтунда республикада 1400-далай гзаф маркетплейсрин пунктар кардик ква. Алатай 2024-йисав ге­къи­гайла, им 3,5 сеферда гзаф я.

Пуд вацра

РД-дин энергетикадин ва тарифрин министерстводи къейдзавайвал, «Яша­йишдин газификация» программадин сер­гьятра аваз, 2025-йисан пуд вацра саки 770 кIвал газдин сетрик кутунва. Идакай ведомстводин телеграм-каналди хабар гузва.

Чешмеди къейдзавайвал, гекъигун яз гъайитIа, 2024-йисан винидихъ къалурнавай муддатда газдин сетрик кутунин рекъем тахминан 2 сеферда тIимил тир — 395.

Раижзавай делилрай малум жезвайвал, газ чара ийидай тешкилатдин векилри «Яшайишдин газификация» программа уьмуьрдиз кечирмишунин карда хьанвай нетижайрикай хабар гана. ИкI, къейдзавайвал, саки 680 кIвал газдин сет­рик кутун патал (ихтилат талукь тир документрикай физваз хьун мумкин я — М.А.) гьазур я. Алатай йисан 1-кварталдиз и рекъем 117-дан агъузди, яни ам 559-дакай ибарат тир.

Телеграм-каналда раижзавай къейде­рай гьакIни малум жезвайвал, шегьеррин ва районрин кьилери агьалияр, «Яша­йишдин газификация» программадин сер­гьятра аваз, пулсуздаказ газдин сетрик экечIдай мумкинвал авайдакай хабардар авунин кIвалахдик тади кутун лазим я.

Гатфариз цун ­патал

Россельхозцентрадин РД-да кардик­ квай филиалдин лабораторийра ахтармишай 90 процентдилай гзаф тумар гатфарихъ цун патал лазим истемишунрихъ (кондициядихъ) галаз кьадайбур, виже къведайбур яз гьисабнава. Идакай «Дагъустан» РИА-ди хабар гузва.

Кьилди къачуртIа, чешмеди, филиалдин пресс-къуллугъдал асаслу яз, кхьизвайвал, тумарин ихьтин ерияр ахтармишзава: михьивал, тумар экъечIдайбур хьун, кьеж кваз хьун, заланвал, зиянлу гьашаратар тахьун  ва уьзуьрар квачиз хьун.

Гьазурайди – Муса Агьмедов