Алатай жуьмя юкъуз, кIвалахдин рекьяй СтIал Сулейманан райондиз фейила, РД-дин Гьукуматдин Председатель Абдулмуслим Абдулмуслимов «Полоса» ООО-дин емишар хуьдай цIийи гьамбарханадин кIвалахдихъ галаз таниш хьана. Идакай чаз РД-дин Гьукуматдин пресс-къуллугъди хабар гана.
«Полоса» инвестпроект «Гзаф бегьер гудай ва шуьмягърин багълар кутун, емишар хуьдай гьамбарханаяр эцигун» проектдин сергьятра авай проект я.
Тешкилатди чи регионда виридалайни еке ва Кеферпатан Кавказда виридалайни зурбабурукай сад тир емишар хуьдай гьамбархана (50 агъзур тонн хуьдай мумкинвал жедай) эцигунин кIвалах давамарзава. Са шумуд паюникай ибарат яз кьилиз акъудзавай и проектдин сад лагьай пай 2024-йисуз акьалтIарна ва 12,5 агъзур тонн гьакьдай гьамбархана кардик акатна. Кьвед лагьай пай 2026-йисуз акьалтIардайвал я. Санлай къачурла, инвестицийрин кьадар 5,2 миллиард манатдикай ибарат я.
«Полоса» ООО-дин гендиректор Арсен Айбатова Абдулмуслим Абдулмуслимоваз ихтилат авурвал, гьамбархана кIандай жуьреда идара ийиз жедай газдин къурулушдалди таъминарнава. Ида анин гьавадин чимивални ламувал гуьзчивилик кутадай мумкинвал гузва.
Карханада алакьунар авай агрономрикай, технологрикай ва маса пешекаррикай ибарат десте кIватIнавайди къейд авунихъ галаз сад хьиз, Абдулмуслим Абдулмуслимова РД-дин Халкьдин Собранидин депутат Имам Яралиеваз проект кьилиз акъудунай сагърай лагьана.
«Сад лагьайди, заз гзаф хуш я хьи, са шумуд йис идалай вилик, зун маса къуллугъдал алайла, чна инвестор Имам Музамудиновичахъ галаз багъманчивал еримлу авунин месэлаяр веревирднай. Ада чи фикирдин тереф хвена ва гегьенш проект гъиле кьуна. Чун гьа чIавуз и проект кьилиз акъудунив эгечIна. Гьа йисара чаз республикада къелемлух кутадай фикир авай. И карни СтIал Сулейманан райондин мулкара гъиле кьуна», — лагьана премьер-министрди.
А. Абдулмуслимова тереф хуьнай хуьруьн майишатдин федеральный министерстводизни, регионда хуьруьн майишатдин месэлаяр гуьзчивилик квай вичин заместитель Нариман Абдулмуталибовазни, министр Мухтарбий Аджековазни чухсагъул малумарна.
Имам Яралиева къейд авурвал, и проект Дагъустандин Кьил Сергей Меликова, РД-дин Гьукуматди куьмек гунин ужунда кьилиз акъудиз алакьна. Ада тереф хвейи вирибуруз сагърай лагьана.
Карханада кIвалахзавай пешекарар, Имам Яралиева ихтилат авурвал, неинки Дагъустандай, гьакI Россиядин маса регионрайни желбна.
Салим Салимов
