7-апрелдиз Дагъустандин Кьил Сергей Меликован регьбервилик кваз респуб­ли­кадин «Гъалибвал» тешкиллувилин­ комитетдин заседание кьиле фена. Анал Гъалибвилин 80 йис тамам хьунин сергьятра аваз тешкилдай суварин мярекатрин план, Дагъустандин шегьерарни районар юбилейдиз гьазур хьунин ва «Гъалибвилин пайдах» серенжем кьиле тухунин месэлаяр веревирдна.

«Гъалибвилин 80 йисан юбилейдиз кьетIендаказ гьазур хьана кIанзава, суварин вакъиаяр инсанрин рикIера амукьдайвал ва фашизмдин винел къачур  ЧIе­хи Гъалибвилин метлеблувал мад сеферда аннамишдайвал. Им исятда лап ва­жиб­лу я», — лагьана С. Меликова.

Дагъустанда тестикьарнавай юбилейдин планда 120-далай гзаф серенжемар ава. Региондин регьберди суварин мярекатрал вири районрин, шегьеррин агьалияр жебл авун (иллаки меркезвияр) важиблу яз гьисабзава. «Каспийскда тешкилдай военный парад ва «Гъалибвилин пайдах» серенжем лайихлу дережада аваз кьиле тухун патал чна чарасуз тир вири крар авуна кIанда», — къейдна ада.

Вице-премьер Муслим Телякавова, ЧIе­хи Гъалибвилин юбилейдиз ва Ватан­ хуьзвайбурун йисаз­ бахшна кьиле тухван­вай ва тухудай мярекатрикай малум­атар га­на. Йисан эвел кьилелай апрелдалди республикада­ ге­гьенш 69 мярекат­ тешкилна, абурук выставкаяр, театр­дин сегьне­яр, ватанпересвилин серенжемар ва спортдин акъажунар ква. «Блокададин фу» серенжемдин сергьятра аваз, волонтерри фан лишанлу кIусар пайна, мектеб­ра кIелзавайбуру флешмобра иштирак­на­­. 2-февралдиз Сталинграддин­ женгериз­ бахшнавай кинояр къалурна ва ви­кIегь­вилин тарсар кьиле фена. «Аскердиз­ савкьат» серенжемдин сергьятра аваз, СВО-дин зонадиз 7 тонн гуманитарный куьмек агакьарна.

Чи мухбир