* * *
8-Мартдин сувариз талукьарнавай шад мярекатар, райадминистрацийрин пресс-къуллугърин малуматрал асаслу яз, Мегьарамдхуьруьн, Кьурагь, Ахцегь ва Докъузпара районрани кьиле фена.
Кьилди къачуртIа, суварин вилик квай юкъуз Мегьарамдхуьруьн райондин кьил Фарид Агьмедова СВО-да телеф хьайибурун дидейриз ва хендедайриз сувар тебрикна. Администрациядин жавабдар къуллугъчийрихъ ва хуьрерин поселенийрин кьиле авай ксарихъ галаз санал ам 7 хизандиз мугьман хьана. Абуруз сувар тебрик авунин чими келимайрихъ, сабурар гунихъ ва кьегьал рухваяр тербияламишунай сагърай лугьунихъ галаз сад хьиз, Ватан патал чанар гайи ксарин кьегьалвилер рикIелай алуд тийидайди къейдна.
ИкI, мугьман хьайи ксарин арада ава: Айшат Чубанова — Ризабег Саркарован баде (Гъепцегь), Рефига Къазиева — Мераб Къазиеван диде (ЦIийихуьр), Раиса Балаева — Эдуард Балаеван диде (КьепIир-Къазмаяр), Света Гьажибегова — Ширинбег Гьажибегован уьмуьрдин юлдаш (КьепIир-Къазмаяр), Гуьльнара Агьметханова — Насруллагь Агьметханован диде (Хтун-Къазмаяр), Халум Шихсаидова — Ринад Шихсаидован (Ярукьвалар), Сувар Къагьриманова — Тельман Къагьриманован диде (Советский).
* * *
7-мартдиз Кьурагь райондин культурадин макандиз СВО-дин иштиракчийрин ва гьакI ана телеф хьайи ксарин дидейриз, уьмуьрдин юлдашриз, хендедайриз эвер ганвай. Мярекат райондин кьил Замир Азизова тебрикдин ихьтин гафарилай ачухна:
— Играми дишегьлияр — дидеяр, вахар, райондин агьалийрин гуьрчег пай! Къенин регьятди тушир девирда дуьнья ислягь хьунин келимаяр кьетIендаказ алхишиз кIанзава. СВО-да иштиракзавай куь рухвайрин, гьакIни Ватан патал чпин чанар гайибурун макьсад чилел ислягьвал хьун я. Ахьтин кьегьалар тербияламишунай куьн сагърай, чна куь вилик, юкь агъузна, икрамзава. Къуй махсус серенжем фад акьалтIна, куь багърияр — рухваяр, уьмуьрдин юлдашар, стхаяр — сагъ ва саламат яз кIвалериз хтурай! Гележегда квез суварар куь хизанра шадвилелди къейддай йикъар акурай! — алхишна ада.
Мярекатдал кIватI хьанвайбуруз сувар райондин дишегьлийрин общественный Советдин председатель Эльмира Исаевадини тебрикна.
— Женнет дидейрин кIвачерик ква. Диде велед патал виридалайни багьа кас я. Дидейрин вилерин экв садрани квахь тавурай! Къе хва СВО-да авай дидедин рикI секин туширдакай чаз хабар ава. За вири дидейриз сувар тебрикзава. Къуй куь рухваяр анай сагъ-саламат яз хтурай! Дидейриз и югъ виридалайни чIехи сувар, чIехи пишкеш я. Квез Аллагьди сабурар гурай! Умуд кутаз кIанзава хьи, чна цIи кьве гъалибвал къейдда: Ватандин ЧIехи дяведа гъалибвал къазанмишна 80 йис тамам хьун ва махсус серенжем гъалибвилелди акьалтIун.
Тебрикдин келимайри, гьакIни райондин культурадин, машгъулардай ва туризмдин центрадин коллективди тамамарай ватанпересвилин манийри кIватI хьанвайбурун гуьгьуьлар мадни хкажна.
* * *
Ахцегьа сувариз талукьарна кьиле тухвай мярекатдиз гзаф аялар, тIимил агьвал авай хизанрай тир дишегьлийриз, СВО-дин иштиракчийрин уьмуьрдин юлдашриз ва дидейриз теклифнавай. Абуруз КЦСОН-дин директордин заместитель Фатима Мурсаловади, Ахцегь райондин кьил Абдул-Керим Палчаеван тIварунихъай райондин дишегьлийрин Советдин председатель Таира Муспагьовади сувар тебрикна.
— Куьне чIуру кардикай фикирмир! Хъсанвилик умуд кутурла, хъсанвал жеда. Куьн тек туш, гьуьрметлу вахар. Куь четин вири месэлаяр райондин кьилин кьетIен гуьзчивилик ква. Мукьвара чи кьегьалар гъалибвал гваз кIвалериз хкведайдак чун кIевелай инанмиш я. Амма чна и кар Аллагьдивай тIалабна кIанда, иллаки пак тир рамазандин вацра, — лагьана Т. Муспагьовади.
Шаир ва жемиятдин активистка Севинжи Муртазалиевади дишегьлияр вичин шиирралди шадарна. Центрадин тербиячийри мугьманриз концертдин гегьенш программа ва пишкешар гана.
Эхирдай дишегьлийри райондин администрациядин кьилевай ксариз ва Центрадин коллективдиз чпиз дикъет гунай ва гуьгьуьлар шадарунай сагърай лагьана.
* * *
8-Мартдиз Докъузпара райондин кьил Мегьамед Шамилов, общественный хатасузвилин рекьяй вичин заместитель Марат Крымов ва Кьилерин советдин кьил Гьудгьуд Бухсаевни галаз, и хуьряй тир СВО-да телеф хьайи Б. Бабаеван диде Сачлу Бабаевадиз мугьман хьана, адаз дишегьлийрин сувар тебрикна.
Мугьманри ва дидеди Ватан патал чан гайи Байканор Бабаеван кьегьалвал рикIел хкана. М. Шамилова СВО-дин иштиракчийрин хизанриз вири патарихъай куьмекар идалай кьулухъни гудайди къейдна. СВО-да телеф хьайибурун экуь къаматар гьамишалугъ рикIера амукьдайдахъ инанмишарна.
Суварин йикъан сергьятра аваз, гьукумдин органрин векилар Арсен Байрамован баде Тейфу Алискеровадиз, СВО-да телеф хьайибурун дидейриз — Гуьлимат Шагьвердиевадиз, Альбина Мамедовадиз ва Гуьлжейран Къиличхановадиз — мугьман хьана, абуруз сувар тебрикна. Абурун рухвайрин кьегьалвилерикай суьгьбетарна, абуруз сабурар гана, халис ватанпересар тербияламишунай дидейриз сагърай лагьана.
8-Мартдиз райондин центрадал алай идарайриз физ, гьакIни куьчейра волонтерри дишегьлийриз цуьквер гана, абуруз сувар тебрикна.
Р. Рамалданова
