Дишегьлийрин международный йикъан сергьятра аваз СтIал Сулейманан райондин администрациядин дараматда район, санлай общество вилик тухуник лайихлу пай кутазвай дишегьлийрихъ галаз шад гьалара гуьруьш тешкилнавай. Идакай чаз райадминистрациядин пресс-къуллугъди хабар гана.
Райондин кьил Саид Темирханова дишегьлийриз сувар тебрик авунин чими келимайрихъ галаз сад хьиз, абуру райондин уьмуьрда къугъвазвай роль къейдна ва гьакъисагъвилелди зегьмет чIугунай, яшайишдин жуьреба-жуьре хилера активнидаказ иштиракунай рикIин сидкьидай сагърай лагьана.
— 8-Март — кьетIен югъ я, адахъ дерин мана ва важиблувал ава. Играми дишегьлияр! Куьн куь хизанрин даях ва чи общество патал умудлувал я. Уьмуьрдин жуьреба-жуьре пешеяр — образованидилай здравоохраненидалди, культурадилай яшайишдин хилелди — вилик тухуник куьне кутазвай пай лап зурбади я. Къе чун неинки куь агалкьунар ва лайихлувилер, гьакIни куьне гьар йикъан уьмуьрда къалурзавай дурумлувал ва сабурлувал къейд авун патал кIватI хьанва. Куьне чIугвазвай зегьметди СтIал Сулейманан район абадвал ва дуствал авай макандиз элкъуьрзава. Къуй квехъ мадни еке агалкьунар хьурай! — лагьана Саид Темирханова.
Тебрикдин гафарилай кьулухъ яшайишдин жуьреба-жуьре хилера тафаватлу хьайи дишегьлийрив шабагьар вахкана. ИкI, яргъал йисарин ва гьакъисагъ зегьметдай, гьакIни дишегьлийрин международный йикъан сергьятра аваз райондин кьили ЦРБ-дин аялар хадай отделенидин санитарка Шафигъа Бабаевадиз, «АлиЯк» ООО-дин машиндалди калер ацадай оператор Имамат Гьажиевадиз, «Благоустройство-Касумкент» МБУ-дин техникадин рекьяй къуллугъчи Нарима Гьасанагъаевадиз, Курхуьруьн 1-нумрадин СОШ-дин муаллим Гуьзел Межидовадиз ва райадминистрациядин умуми отделдин кьилин пешекар Сефият Тагьировадиз гьуьрметдин грамотаяр гана.
Райондин кьилин тIвар алай сятер гуналди къейдна: Цмуррин хуьруьн поселенидин администрациядин кьил Раида Алибегова, ЦIийи хуьруьн СОШ-дин педагог-библиотекарь Нафисат Агъабалаева, ЦРБ-дин санитарка Афисат Арасханова, «Благоустройство-Касумкент» МБУ-дин техникадин рекьяй къуллугъчи Раижат Гьуьсенбегова ва И.Гь. Тагьирован тIварунихъ галай ЦТКНР-дин секретарь-машинист Мадина Къурбанова.
Агъа СтIалрин-Къазмайрин школадин математикадин муаллим Надежда Фатаховадиз райондин кьилин патай Разивилин чар гана.
СтIал Сулейманан районда кьиле фейи мярекатдиз Кьиблепатан Дагъустандин маса районрай тир лезги чIалан муаллимриз ва яратмишунардай интеллигенциядин векилризни эвер ганвай. Мярекатдал ватанпересвилин ва руьгьдинни ахлакьдин жигьетдай акьалтзавай несилдиз тербия гуник, миллетрин ва динрин арада ислягьвални разивал мягькемаруник, гьакIни хайи чIал хуьник лайихлу пай кутур ксарив Дагъустандин милли сиясатдин ва диндин крарин рекьяй министерстводин патайни чухсагъулдин чарар вахкана. Райондин образованидин хиле зегьмет чIугвазвай са шумуд кас министерстводин гьуьрметдин грамотайралди къейдна.
Шад мярекатда меценат Нариман Гъазалиевани иштиракна. Ада дишегьлийриз сувар тебрик авунихъ галаз сад хьиз, абурун чIехи къиметдиз лайихлу тир зегьмет ва пешедиз вафалувал къейдна. Меценатди абуруз пулдин пишкешар гана (гегьеншдиз 16-чинай кIелиз жеда).
Мярекатдал дишегьлийри сувар тешкилай ксариз сагърай лагьана, чпин агалкьунрикай ва гележегдин планрикай суьгьбетарна. Шабагьар вахкай гьар са дишегьлиди райондин кьилевайбуру абурун кIвалахдиз къимет гунихъ еке важиблувал авайди къейдна.
Рагнеда Рамалданова
