5-мартдиз Ахцегь райондиз РД-дин образованидинни илимдин министр Ягья Бучаев ва адан заместитель Айида Далгатова атана. Багьа мугьманар «Ахцегь район» муниципалитетдин кьил Абдул-Керим Палчаева, райондин образованидин управленидин начальник Халидин Эльдарова ва жавабдар маса юлдашри къаршиламишна.
Ахцегьрин 3-нумрадин СОШ-да Ахцегь ва Докъузпара районрин школайрин кьиле авайбурухъ галаз педсовещание кьиле тухвайдалай кьулухъ абуру Цуругърин школадин кьилин дарамат ачухна. Шадвилин мярекатда школадин коллективдилай алава, райондин идарайринни карханайрин регьберри, жемиятдин тешкилатрин ва чкадин СМИ-дин векилри иштиракна.
РикIел хкин, гъилевай йисуз Цуругърин школади вичин 100 йисан юбилей къейдзава. Дуьз са асирдин вахтунда мектебда кIелай вишералди цуругъвийри, гьар жуьре рекьерай зурба пешекарар хьана, хайи хуьр вири республикадиз ва уьлкведиз машгьурна. Абурун жергеда бажарагълу алимар, инженерар, архитекторар, СВО-дин кьегьалар ава. Алай вахтунда хуьруьн школада 118 аялди кIелзава…
Мугьманар хушдиз тебрикуналди, шадвилин мярекат Абдул-Керим Палчаева ачухна:
— Гьуьрметлу юлдашар, къе Цуругърин хуьруьн тарихдин лишанлу югъ я: бинедилай ремонт авурдалай кьулухъ аялриз саки тамам цIийи школади вичин варар ахъайнава. Мубаракрай! Лугьун хьи, эцигунрин кIвалахар еке четинвилерихъ галаз алакъалу хьанатIани, РД-дин Кьил Сергей Меликован ва образованидин министр Ягья Бучаеван куьмекдалди, республикадин инвестицийрин программадин сергьятра аваз, 2024-йисан апрелдилай декабрдалди, кIуьд вацра, школадин кьилин дарамат саки цIийи кьилелай эхцигна, ишлемишиз вахкана. Гила цуругъви аялриз вижевай спортзал, медкабинет, актовый зал, чими ятар авай санузелни галай къулай шартIарин школа ава. Им муаллимриз ашкъилувилелди тарс-тербия гуз ва аялриз агалкьунралди чирвилер къачуз гьевесламишдай шартI я. И кардай за райадминистрациядин, райсобранидин депутатрин ва вири халкьдин патай Сергей Меликоваз, Ягья Бучаеваз ва эцигунрин кIвалахрив жавабдарвилелди эгечIай ООО «Ремонтстрой» карханадин регьбер Гьажибег Рамазановаз чухсагъул лугьузва.
Гуьгъуьнлай РД-дин образованидинни илимдин министр Ягья Бучаев рахана:
— Гьуьрметлу аялар, муаллимар, цуругъвияр! Девирдин истемишунрив кьадайвал туькIуьрнавай и гуьзел школа квез мубаракрай! 2022-йисуз РД-дин Кьил Сергей Алимович атана, школадин кьилин дараматдин гьал ва куь арзаяр акурла, чаз талукь тир тапшуругъ ганай. Уьлкведа СВО кьиле физвай девирдин кьит бюджетдизни килиг тавуна, ада и школа патал пулдин такьатар жагъурна. Гуьгъуьнлай гьабурни бес тахьана, Ахцегь раймуниципалитетдин кьил Абдул-Керим Палчаева бюджетдинбур тушир такьатар желбна ва бинедилай ремонтдин кIвалахар хсуси гуьзчивилик кутуна. Къе Цуругъа республикадин гзаф чкайра авачир хьтин дамахдин школа хьун, эвелимжи нубатда, РД-дин ва Ахцегь райондин регьберар Сергей Алимовичан ва Абдул-Керим Нажмудиновичан лайихлувал я, абур пара кьадар сагърай! Дагъдин хуьре ихьтин шартIарин школада зайиф тарсар-чирвилер тахьун лазим я, — лагьана министрди.
Мярекатдал тебрикдин хуш келимаяр гваз «Цуругърин хуьр» СП-дин кьил Шимсидин Мерданов, Афгъан дяведин вакъиайрин ветеран Севзихан Мирзеханов, педагогикадин зегьметдин ветеран Асанали Мегьамедханов ва маса юлдашар рахана.
Школадин лишанлу лент атIайдалай кьулухъ, мугьманар ана классрихъни кабинетрихъ галаз мукьувай таниш хьана ва рази яз амукьна. Мярекат райондин культурадин управленидин гьевескар артистри (Таира Муспагьовади, Рубаба Къурбановади, Исмаил Ризаханова, Ренад Гъаниева), райондин искусствойрин школадин, гьакI Цуругърин СОШ-дин аялри чпин манийралдини кьуьлералди мадни хъсанарна.
Гьа и юкъуз Ягья Бучаева райадминистрациядин залда образованидинни яшайишдин месэлайрай муаллимар кьабулна, образованидин хиле яргъал йисара намуслувилелди кIвалахзавай са жерге муаллимриз гьуьрметдин грамотаяр гана.
Къейд ийин пакадин юкъуз РД-дин Кьил С. А. Меликова вичин телеграм-каналда ихьтин келимаяр кхьена: «Цуругъви аялриз цIийи школа мубаракрай! Заз чида, абуру и югъ фадлай гуьзетзавай. ЦIийи школадин патахъай аялрин «арза» агакьайла, чкадал фена, лап хаталу гьалда авай 100 йисан дарамат заз жуван вилералди акуна, ам цIийи кьилелай туькIуьр хъувунив эгечIна. Чи мурад гьатта дагъдин кукIвавай хуьруьн гьар са аялдизни шегьерра хьтин къулай шартIара кIелдай мумкинвал таъминарун я. Гьавиляй эхиримжи йисара школаяр эцигунин ва ремонтунин карда Дагъустан уьлкведа кIвенкIвечибурун жергеда ава. Анжах 2024-йисуз республикада цIийи 22 школа ва аялрин 12 бахча эцигнава, гзаф школаяр бинедилай ремонт хъувунва, са жерге спортмайданар туькIуьрнава ва икI мад. Эхиримжи 5 йисан муддатда уьлкведин «Образование» ва «Демография» проектрай Дагъустанда девирдин вири истемишунриз жаваб гузвай цIийи 110 школани аялрин 90 бахча ачухнава. Гъилевай 2025-йисуз республикадин руководстводин пландик кIуьд школани кьве бахча капремонт авун, гьакI образованидин са жерге цIийи объектар эцигун ква. Образование чи гележегдин вири агалкьунрин бине я!».
Дашдемир Шерифалиев
