Дагъустандин гьукумдин органрин кьиле­вайбуру федеральный къурулушривай­ ре­гиондин мулкунал Telegram мессенд­жер­дин  кIвалах акъвазарунин гьакъиндай­ къарардиз цIийи кьилелай килиг хъувун­ тIалабзава. Идакай республикадин ре­къем­­­рин рекьяй вилик финин минис­тер­стводин Telegram-каналди хабар гузва.

«Къейд ийиз кIанзава хьи, республикада жемиятдизни сиясатдиз талукь гьалар дурумлубур тир ва гилани гьакI я, гьаниз килигна, регионда рафтарвал хуьнин рекье виридалайни машгьур платформайрикай сад тир Telegram  яргъал вахтуналди къадагъадик кваз тунин игьтияж авач. Telegram-дин кIвалах акъвазаруни  са жерге муракаб месэлаяр  арадал гъизва. И къурулуш ишлемишзавай ксарин чIехи пай, ам ачухун патал,  VPN-къуллугърикай менфят къачуниз мажбур жезва, ида лагьайтIа, инсанрин хсуси делилар къерехдиз финин ва и делилрин сирлувал квахьунин хаталувал арадал гъизва», — лугьузва малуматда.

Министерствода гъавурда турвал, регионда Tелеграмдин кIвалах акъвазаруни неинки чкадин жемят, гьакIни республикадиз къвезвай туристар патални къулайсузвилер арадал гъизва. РД-дин рекъемрин рекьяй виликди финин министр Юрий Гьамзатован гафаралди, мессенджердал къадагъа эцигуни «бегьем инжиклу ийизва».

«Алакъадин къулай ва вердиш тир та­кьат­­­рик тIем акакьун  республикадин агьали­яр­ ва мугьманар патал гьикьван важиблу ятIа, чун гъавурда гьатзава. Умуд кутазва­, гьукумдин федеральный органривай къада­гъа эцигуни арадал гъизвай чIуру нетижа­яр тIи­ми­лар­дай мумкинвал гудай къарар жа­гъуриз­ ва хатасузвал таъминарунинни агьа­лийрихъ­ галаз азаддаказ рафтарвал авунин жигьетдай­ авай ихтияррин арада барабарвал­ хуьз жеда»­, — къейдзава министерстводин пресс-къул­­лугъ­ди Ю. Гьамзатован гафарал асаслу яз­.

Идалай вилик  Дагъустанда ва Чечняда Telegram мессенджердин кIва­­лах­дал къадагъа эцигунин къарар, къайда хуьдай органри фикирдал гъуналди, федеральный дережада кьабулайдакай хабар ганай.

Мессенджердал къадагъа эцигунин къа­рардиз цIийикIа килиг хъувун лазим тирдакай идалай вилик Чечнядин милли сиясатдин, къецепатан алакъайрин, печатдин ва информациядин министр Агьмед Дудаевани малумарнай.

Амина  Муслимова