Гераев Шамил Айнудинович Белиж поселокда 1987-йисуз дидедиз хьана. Муьжуьд лагьай классдал кьван ада поселокдин 2-нумрадин юкьван мектебда кIелна, 9-11-классра кIелун гимназияда давамарна. 4-классда кIелдайла, ам дахди спортшколадиз тухвана, азаддиз кьуршахар кьунай вердишвилер гузвай тренер Мингьажидин Къазиеван гъилик кутуна. ИкI ада, гъвечIизамаз вичин таярихъ галаз акъажунриз экъечIиз, гагь кIаник акатиз, гагь гъвечIи гъалибвилер къазанмишиз, спортдал машгъул жезвай жаванрин арада вич лигимарна.

Мектебда амаз адан рикI военный хьунал алай. 2005-йисуз ам РФ-дин МВД-дин къенепатан кьушунрин генерал И. К. Яковлеван тIварцIихъ галай Новоси­бирск­дин институтдик экечIиз фе­на. Акатнач. 2006-йисуз ам мад вичин рикIе авай мурад кьилиз акъудиз гьа институтдиз фена. Мад хьанач. Эхирни 2007-йисуз ам вичин мураддив агакьна — институтдик экечIна.

Кьуд лагьай курсуна кIелиз эгечIайла, диде-буба сагъсуз ва абурухъ гелкъуьн герек хьуниз килигна, ам кIелун акъвазаруниз мажбур хьана.

Диде-бубадин гьалар тIимил кьван ачух хъхьайла, Ш. Гераев Чечен Республикадин Калиновск­да авай военный частуниз фена, икьрар кутIунна, къуллугъдал акъвазна. Ина ада кьве йисуз взводдин командирдин везифаяр тамамарна. Военный къуллугъдал финин сад лагьай себеб диде-бубадин сагъламвал мягькемар хъийиз куьмек гун ва кьвед лагьай себебни военный къурулушда амукьун хьана.  ГьикI лагьайтIа, адан рикIе вичи хкянавай рекьяй кIелун давамар хъувун авай.

Калиновскда ада Кеферпатан Кавказдин мулкара дестейриз чара авунвай сад тир кьушунрин командирдин сад лагьай заместителвиле къуллугъна. Ина адан гъилик квай дестеди са шумудра терроризмдиз акси серенжемра чеб викIегьдаказ къалурна. ЧIехи командованиди вилик эцигай везифаяр дестеди жуьрэтлудаказ кьилиз акъудна.  Къуллугъда къалурай кьегьалвилерай Ш. Гераев­ «Женгера баркаллувиляй» ва «Тер­роризмдиз акси серенжемрин иштиракчи» медалриз лайихлу хьана.

2013-йисуз ам институтдик экечI хъийизва. Ина жемиятдинни спортдин мярекатра иштиракунай ва вадралди кIелунай ам РФ-дин къенепатан кьушунрин министерстводин «Чешнелудаказ­ къуллугъ авунай» кьвед лагьай дережадин медалдиз лайихлу жезва. Военный институтрин курсантрин арада аскерар гъилералди кукIунай кьиле фейи акъажунра къазанмишай агалкьунрай адаз спортдин мастервилин дережа гана.

2015-йисуз институт яру дип­ломдалди акьалтIарай лей­те­нант­ Волгограддин областдин Дон­дал алай Калач поселокдиз ракъурна. Ина офицерди пуд йисуз кар фад кьиле тухудай взводдин командирдин везифаяр та­ма­марна.­ Ахпа ам аскеррихъ галаз кIвалахунай ротадин командирдин заместителвиле тайинарна.

Женгиниз гьазурлухвиле­  агал­­кьунрай ва жуьрэтлувиляй­ адаз командованиди 2018 ва 2019-йисара «Чешнелудаказ къул­­лугъ авунай» кьвед ва пуд ла­гьай дережайрин медалар гана­.

2020-2024-йисара Шамил Айнудиновича Астраханда кар фад  кьиле тухудай (рота оперативного назначения) ротадин командир яз къуллугъна.

Махсус серенжем гатIунай йи­­сан февралдиз капитан Гера­ев «Рагъ­акIидай пад» дестедихъ­ галаз За­порожье областдиз­ гьахьна. 2022-йисан мартдиз Пологи­ шегьердин къерехда женгинин­ гьерекат тухузвайла, абур алай чкадиз миллетчийри, акъваз­ тийиз­, тупарай гуьлле гана. Кьве снаряд­ Ш. Гераеван ротадин­ ко­мандный­ пунктунал аватна. Са кас кьена­, Ш. Гераевал ва вад касдал, хъиткьинай снаряддин кIу­сар галукьна, хирер хьана. Кьи­лиз тIар­вал ганваз, ютурда гуьл­ледин кIу­сарни аваз, Шамил вич вичи­вай квахьнач. Ада залан хирер­ хьанвай аскерарни офицерар саламат­ чкадиз акъудна, вичи миллетчийрихъ галаз женг тухун давамарна. Пуд йикъалай хирерикди кIвач дакIваз, иринламиш жез гатIунна. Командованидин буйругъдалди­ Шамил госпиталдиз ракъурна. Чкадал дуьзгуьн куьмек гудай медицинадин шартIар авачир. Вахтунда  куьмек агакь тавур ам, сагъламвал мягькемар хъийиз, вад больницадани госпиталра хьана.

Ватан хуьнин карда къалурай жуьрэтлувиляй, дирибашвиляй Ш. Гераеваз Жукован медаль гана.

Винидихъ тIварар кьунвай ша­­­багьрилай гъейри, Шамил мад кьве сеферда «Чешнелудаказ къуллугъ авунай», «Дяведин махсус серенжемдин иштиракчи» медалрин ва кар фад кьиле тухудай кьилдин 22-бригададин 30 йис, вичи кIелай институтдин 45 йис, Россиядин МВД-дин къенепатан кьушунрин 200 йис юбилейрин медалрин сагьибни я.

2024-йисан июлдиз военный духтуррин комиссияди ам къуллугъ давамаруникай вахтуналди акъвазарнава. Сагъламвал мягькемар хъувун давам жезва. Чи мурад игит хва фад сагъ хъхьун я.

Ш. Гераевани адан уьмуьрдин юлдаш Наимат Мегьамедов­нади кьве аялдиз тербия гузва.­ Мугьаммада — вад лагьай, Сали­гьа кьвед лагьай классра кIелзава.

Къуй дяве акьалтIрай. Чи ас­керар, гъалиб хьана, сагъ-сала­матдиз кIвалериз хтурай!

Къагьриман Ибрагьимов