Гьич са касни, гьич са затIни рикIелай алудзавач!
Чна гьеле хабар гайивал, 2024-йисуз Ахцегь райадминистрациядин къарардалди Луткунрин пуд мертебадин цIийи школа РФ-дин Игит, гвардиядин полковник Мегьамеджанов Мегьамедали Камильевичан тIварунихъ яна. И йикъара школадин дараматдин вилик Игитдиз памятник ачухунин мярекат кьиле фена. Ам бажарагълу скульптор, Россиядин художествойрин академиядин академик, Шариф Шагьмарданова туькIуьрна.
Мярекатда Ахцегь ва Рутул районрин регьберри, идарайрин коллективри, РД-дин Кьилин векилри, Луткунрин ва Хъуьлуьдрин агьалийри, школьникри, Игитдин женгинин дустарини мукьва-кьилийри иштиракна. Мегьамедали Мегьамеджанован уьмуьрдинни аскервилин къуллугъдин баркаллу рекьикай гаф рахуналди, мярекат Ахцегь райондин культурадин управленидин начальникдин заместитель Сулейман Сулейманова ачухна.
Кьегьал хва, гвардиядин полковник Мегьамедали Мегьамеджанов 1967-йисуз Рутул райондин Хъуьлуьдрин хуьре зегьметкеш хизанда дидедиз хьана. Зигьинлу, дирибаш гадади хуьруьн мектеб агалкьунралди акьалтIарна, колхозда кIвалахна. 1986- 1987-йисара армиядин жергейра къуллугъна. Чешнелу аскер частунин командирдин теклифдалди Рязандин высший воздушно-десантный командный училищедик экечIна. Анаг лап хъсан къиметралди куьтягьна.
Къуллугъдин рехъ офицерди Мурманскдин областда Кеферпатан флотдин гьуьлуьн пияда кьушунрин кьилдин 61-бригададин 876-батальондин десантникрин взводдин командирвилин везифайрилай башламишна.
2016-2018-йисара Мегьамедали Камильевич Чечен Республикада ва Сирияда террористрихъ галаз къати женгера хьана.
Донбассдин чилер неонацистрикай азадзавай махсус серенжемдик гьа сифте йикъалай экечIна. Къуллугъдин везифаяр лап хъсандиз кьилиз акъудзавай, дяведин илим чирунал алахъзавай ва вичин гъилик квай аскеррин саламатвилин къайгъуда авай чешнелу офицерди гьам командованидин, гьамни женгинин юлдашрин патай гьуьрмет къазанмишна. И кардин гьакъиндай адан къуьнерал артух жезвай гъетери ва шабагьри шагьидвалзавай.
Эхиримжи вахтунда полковникди Кеферпатан флотдин гьуьлуьн пияда кьушунрин Яру пайдахдин Кирнессдин 61-бригададин командирвилин, РФ-дин Кьиблепатан военный округдин 18-армиядин командующийдин заместителвилин жавабдар везифаяр тамамарнай.
Эхиримжи женгина дагъви офицерди гъилик квай жегьил аскерар къутармишун патал вичин чан къурбандна. 2024-йисан 16-апрелдиз Президент Владимир Путинан къарардалди Мегьамедали Камильевичаз Россиядин Игитвилин тIвар гана…
Мярекатдал «Ахцегь район» МР-дин кьил Абдул-Керим Палчаев рахана.
— Гьуьрметлу юлдашар! Ислягьвал, чи хушбахт гележег патал чан гайи, аскервилин кьинез ва хайи Ватандиз вафалувилин чешне Мегьамедали Мегьамеджанов лезги халкьдин, Дагъустандин, Россиядин лайихлу хва я.
Къе адан памятникдин патав чак гьайифдин, гьа са вахтунда дамахдин гьиссер акатзава. Памятник эцигун ва школадиз Мегьамедалидин тIвар гун — им неинки чи патай адаз еке гьуьрмет авунин лишан, гьакI игитдин, адан хизандин ва Ватан патал жегьил чанар къурбандзавайбурун вилик чи буржи я. Абур чи рикIера эбеди яз амукьда.
РФ-дин Игит Мегьамедали Мегьамеджанован ва дяведин махсус операцияда дирибашвилер къалурзавай дагъвийрин чешнейри чун чи милли къилихрин, ватанпересвилин тербиядин къуватдихъ инанмишарзава. Чи игитрин дирибашвал себеб яз, неонацистрин хура акъвазна, чалай уьлкведин азадвал, аслу туширвал хуьз алакьзава. Гьавиляй, гъиле яракь аваз, Ватан хуьзвай гьар са хцин игитвал рикIел хуьн чи буржи я, — РД-дин Кьил Сергей Меликован тебрикдин Чар кIелуналди, лагьана адан куьмекчи Саид Маматханова.
Игитдин къамат эбеди авунин мярекатдал гьакI Рутул райондин кьил Давуд Сулейманов, РД-дин рекъемрин рекьяй вилик тухунин министр Юрий Гьамзатов, М. Мегьамеджанован женгинин юлдашар, РД-дин дишегьлийрин Союздин председатель Интизар Мамутаева, Луткунрин СОШ-дин директор Заур Мегьамедов, Ахцегь, Докъузпара ва Рутул районрин военный комиссар, подполковник Рафик Мегьамедов ва масабур рахана.
Игит офицердин уьмуьрдин юлдаш Мегьамеджанова Муслимат Шагьпазовнади (старший прапорщиквилин чин авай дяведин къуллугъчи яз, адани гъуьлуьхъ галаз къуллугъдин вири четинвилер пайна) гъуьлуьн къамат эбеди авунай, адан тIварцIихъ чими келимаяр лугьунай Дагъустан Республикадин Кьил С.А. Меликоваз, Ахцегь ва Рутул районрин кьилер А-К.Н. Палчаеваз, Д.А. Сулеймановаз ва рахай амай юлдашриз сагърай лагьана.
Абдул-Керим Палчаевани Муслимат Мегьамеджановади Игитдин памятникдилай перде алудайдалай кьулухъ мярекат Ахцегь райондин культурадин управленидини Луткунрин школадин аялри гьазурнавай ватанпересвилин шиирар кIелунин ва манияр лугьунин куьруь программадалди давамарна. Эхирдай мярекатдин иштиракчийри Игитдин памятникдив цуьквер эцигна ва анал рикIел аламукьдай шикилар яна.
Дашдемир Шерифалиев
