Хъвадай целди

РД-дин эцигунрин, архитектурадин ва ЖКХ-дин министр Бахтияр Уллаеван гафаралди, Дагъустанда 77 процент агьа­лияр хъвадай ерилу целди таъмин­ я. Идакай ведомстводин телеграм-ка­налди хабар гузва.

Кьилди къачуртIа, чешмеди раижзавай делилрай гъавурда акьазвайвал, 2024-йисан нетижайралди, чеб хъвадай ерилу целди таъмин тир агьалийрин кьадар 77 процентдилай алатнава (2019-йисав гекъигайла, им 13,9 процентдин гзаф я).

Б. Уллаева къейдзавайвал, им гьахъ-гьисабдин вахтунин тестикьарнавай­ план­дилай виниз акъатнавай рекъем я.

Идалайни алава яз, хабар гузвайвал, проектар уьмуьрдиз кечирмишунин кар акьалтIарунин нетижадалди 2024-йисуз хъвадай ерилу яд респуб­ликадин 58,28 агъзур агьали патал гъил агакьдайди хьанва.

Артух хьанва

Дагъустанди 2024-йисуз электроэнергия ишлемишунин рекорд  къалурнава. Идакай «Дагъустандин экономика» телеграм-каналди хабар гузва.

Кьилди къачуртIа, чешмеди, РД-дин энергетикадин ва тарифрин министр Марат Шихалиеван гафарал асаслу яз, раижзавайвал, шаз   энергиядин ресурсар 9,4 миллиард  кВт/ч ишлемишнава. 2023-йисав  гекъигайла, им 9 процентдин, 2020-йисан рекъемдив гекъигайла, 36,5 процентдин гзаф я.

М.Шихалиева 2024-йисан декабрь кьетIендиз къейдзава. И вацра Дагъус­тандин тарихда сифте яз электроэнергия ишлемишунин кьадар 1 миллиард кВт/ч-дилай алатна.

Идалайни гъейри, суткада электроэнергия ишлемишунин тарихдин вини кьадарни тайинарнава — 1620 мегаватт, алатай йисан рекъемдилай (1615 мегаватт) са тIимил виниз акъатуналди.

Газдиз талукь яз

Дагъустанда 2025-йисуз 17 агъзурдалай виниз кIвалер газдалди таъминарда. Идакай «Дагъустан» РИА-ди кхьизва. Къейдзавайвал, алай йисуз республикада газдин къурулуш екез гегьеншарун пландик кутунва.

Агентстводи, РД-дин энергетикадин ва тарифрин министр Марат Шихалиеван гафарал асаслу яз, раижзавайвал, газдалди таъминарунин программадиз пулдин такьатар ахъаюнин кьадар 3 сефердилай виниз артух жеда.

Адан гафаралди, алай йисуз 18 объект эцигун пландик кутунва. И карди республикадин агьалияр яшамиш жезвай чкайра, винидихъ къейднавайвал, 17 агъзурдалай виниз кIвалер газдалди таъминардай мумкинвал гуда.

ЦIийи къайдада

Дагъустанди электросетар цIийи къайдада туьхкIуьрун патал саки­ 10 миллиард манат къачуда. Идакай «Да­гъустан» РИА-ди кхьизва.

Кьилди къачуртIа, чешмеди, РД-дин энергетикадин ва тарифрин министр Марат Шихалиеван гафарал асаслу яз, раижзавайвал, республикадив электросетар цIийикIа туькIуьр хъувун патал 9, 8 миллиард манат агакьда. И такьатар Дагъустандин ва Махачкъаладин электросетрин комплексдин мягькемвал хкаждай программа кьилиз акъудун патал тайинарнавайбур я.

Хабар гузвайвал, чпикай ихтилат физвай такьатар электросетрин комп­лексдин 105 объект 2027-йисалди цIийи­­кIа туьхкIуьрун патал серфда. Министрдин гафаралди, пулдин такьатар федеральный бюджетдай агакьда.

Кьилиз акъуднава

Дагъустандин МФЦ-ди 2024-йисуз республикадин агьалийриз 2,5 миллион­ къуллугъ кьилиз акъуднава. Идакай­ Да­гъустандин МФЦ-дин директор М. Арс­ла­налиева хабар гана.

Адан гафаралди, и рекъемри госу­дарстводи эцигнавай тапшуругъ 25 про­центдин артухни алаз кьилиз акъуддай мумкинвал ганва.

Санлай республикада МФЦ-дин 59 филиалди кIвалахзава, къуллугъар авуник кутуни (охват) 97% тешкилзава.

Гьазурайди — Муса  Агьмедов