1943 йисан Февралдиз Сталинграддин гьужум акьалтIна. И гъалибвилик лезги рухвайрини чпин пай кутуна. Зи бубадин чIехи стха, ими, КьепIир-Къазмайрин мектебдин муаллим, Алибегов Жаруллагь гуьгьуьллудаказ дяведиз фена. Ам, мектебдин вилик Айнаханум лугьудай кIани руша вичин гъилелди кхьей пуд тIуб чар гваз атана дяведиз рекье тунай. А чарче авайди пуд гаф тир. «За вун гуьзетда…»
Къизил дидени Алибег буба геждалди хва вилив хуьз хьаналдай. Абурун рикI секинарзавайди анжах кIвале амай зи буба ва эме тир.Тажуб жедай кар ам я хьи, дидеди суфрадал артухан къаб эцигдалдай, Жаруллагьан тIвар кьуна, гарун ван атайла, ракIарихъ фидалдай, белки, хва хтанатIа лугьуз. Дяве куьтягь хьайила, дидени буба сад-садан гуьгъуьналлаз уьмуьрдай фена. Хва хтун тавурла, ялар хьана, месиз яналдай. ИкI ахъайнай заз Пенкер бадеди.
1942-йисан зулун эхиримжи вацра зи ими Сталинграддин гьужумда телеф хьана. Фронтдай рахкурай чарче гьакI кхьенвай.
За гьамиша адаз ва Сталинграддин чилел телеф хьайи советрин вири миллетрин рухвайриз регьмет гъизва, ара-бир тIвар кьуна садакьани гузва. Гьа зулуматдин дяведай хтай рухвайрин невейри чанар гана Афганистанда. Къе ингье СВО-да иштиракзава.
Зи Мусаиб стхадин гада Сума шегьерда дидедиз хьана. Диде украинка я. Лида свас халис лезги хьтинди я. Адаз кичIезва велед, чи хтул дяведиз тухуз, я туш зи стхадин сурал ана кучукнавай цIай аватиз. За инай адаз сабурар гузва датIана, куьтягь жеда дяве, кичIе жемир лугьузва.
Къе Чилин саки вири пипIера дявеяр ава. Вучиз? Яраб мус жедатIа и дуьньядал ислягьвал?
Бикеханум Алибегова
