Саид Къагьриманович Къагьриманов… Ам чаз чиз хейлин йисар я. ГьикI хьи, гьар ЦIийи йис алукьдайла, чун адаз мугьман жезва, Каспийск шегьерда “Лезги газет” кхьин гьадалай башламишзава.
Адан гафунал гаф эцигдай я лезги, я маса миллетдин векил чал а шегьерда гьелелиг гьалтнач. Нуфузлу хва, гьакьван савадлу, уях адвокат, лайихлу юрист, Каспийск шегьердин Гьуьрметлу агьалийрикай сад, шегьердин агъсакъалрин Советдин член, чIехи хизандин кьил, яр-дустунал рикI алай дуст…
Адан ери-бине Ахцегь райондин Смугъулрин хуьряй я. Гьеле аялзамаз кьилелай буба алатна. Дяведин залан йисара 3-класс куьтягьай Саидакай хуьруьн колхоздин жегьил чубан хьана. РикIе къаст авай гадади гележегда Ахцегьа школа-интернат, Ростовдин госуниверситетдин юрфак лап хъсан къиметралди акьалтIарна. Гьа чIавалай ам Ватандин законар хуьдай органра кIвалахунив эгечIна. Ада Пятигорск, Сочи, Кисловодск шегьерра, Дагъустандиз хтана, Рутул районда судьявал авуна. Инай ам хизан галаз Каспийск шегьердиз куьч хьана, вири мумкинвилер судьявилин, ахпани адвокатвилин пешедиз бахшна.
Чирвилери, юриствилин пешекарвили, закондиз вафалувили, руьгьдин михьивили ам дережайрин кьакьанвилихъ тухвана. Хейлин йисара ам ДАССР-дин Верховный суддин кьилени хьана. Виринра ада вич чешнелу юрист, чIехи руьгьдин инсан тирди субутна. Жегьил пешекарарни тербияламишна.
Ватанди, государстводи адан зегьметдиз лайихлу къиметни гана: ам В.И. Ленинан 100 йисан юбилейдин медалдин, “Знак Почета” ордендин, хейлин маса наградайринни гьуьрметдин тIварарин сагьиб я.
Жуван са тебрикда Саид Къагьримановичан гьакъиндай за кхьенва:
Саид халу — къагьриманрин къагьриман!
Авайди я гьамишанда дуьз фарман!
Гьахъвал хуьрла кьатIун жеда алмасдин,
Хун садрани какадардач атIласдик!
Чидайбуруз лап халисан далу я!
Пелни кьакьан Шалбуздилай зарлу я!
И михьивал, гьакъикъивал сагъ хьурай!
Гьамиша ви жегьил рикIе рагъ хьурай!
И гафар за мад сеферда тикрарзава, гьикI хьи, абур куьгьне хьанвач…
И йикъара ветеранди вичин 85 йисан юбилей къейдзава. Ам тебрикиз хизанар шегьердин ветеранар, ярар-дустар санал кIватI жеда. “Лезги газетдин” редакциядин коллективни абуруз шерик я. Мубаракрай юбилей! Рехъ вилик ква ви гьеле!…
М.Жалилов
