Алай йисуз «Хуьруьн муаллим» («Земский учитель») программада 10 касдивай иштиракиз жеда. Идакай РД-дин образованидин ва илимдин министерстводи хабар гузва. «Хуьруьн муаллим» программадин бинеда жегьил пешекарар 50 агъзур касдилай гзаф жемят авачир хуьрерин мектебра кIвалахунал желб авун ава. Конкурсда гъалиб хьайи иштиракчийриз 1 миллион манат пул гузва ва абуру хуьруьн школадихъ галаз икьрар кутIунзава.
2024-йисуз программада анжах 2 муаллимди иштиракна. Санлай къачурла, 2019-йисалай инихъ, и программа себеб яз, республикадин 420 муаллимдиз кIвалахдин чкаяр жагъана.
Лагьана кIанда хьи, Дагъустанда программадин иштиракчияр асул гьисабдай 30-40 йисарин яшда авай муаллимар я.
Программадин иштиракчийривай ийизвай истемишунрик акатзава: документар вугай вахтунда яш 50 йисалай гзаф тахьун, педагогикадин рекьяй юкьван пешекарвилин ва я виниз тир образование хьун, гьакIни педагогикадин хиле кIвалахзавайбурувай ийизвай истемишунриз жаваб гун. Месела, са жерге тахсиркарвилер себеб я, судди жавабдарвилиз чIугунваз тахьун, сагъламвилин жигьетдай кутугай гьалда хьун. Программадин бинедаллаз, документар вугай вахтунда муаллимди вичин пешедай кIвалахиз хьун чарасуз туш, амма бязи регионра ихьтин шартIни вилик эцигзава.
«Хуьруьн муаллим» программадин сергьятра аваз, кIвалах башламишнавай муаллимди вичин хивез школада 5 йисан вахтунда гьафтеда 18 сятинилай тIимил тушиз сятер гваз кIвалахунин мажбурнама къачун лазим я.
Къейд ийин хьи, Дагъустанда хуьрерин муаллимриз куьмек гунин алава маса серенжемарни кваз кьунва. РД-дин образованидин ва илимдин министерстводи хабар гузвайвал, абуруз мажибдин 25 процентдин кьадарда аваз (жегьил муаллимриз — 20 процентдин) алава пул гузва. Идалайни гъейри, ставкадин кьадардин 0,75 процентдилай тIимил тушиз пар алай муаллимриз коммунальный къуллугъриз жезвай харжияр эвезунин пул гузва. И серенжемри хуьруьн муаллимдин кIвалах авайдалай къулайди ва фикир желбдайди авун лазим я.
Жасмина Саидова
