15-16-январдиз Мегьарамдхуьруьн райондин Бут-Къазмайрин юкьван мектебда гьар йисуз жезвай «Лезги чIаланни литературадин виридалайни хъсан муаллим — 2025» конкурс кьиле фена. Ина райондин муьжуьд мектебдай атанвай сифтегьан ва чIехи классра тарсар гузвай лезги чIаланни эдебиятдин муаллимри иштиракна ва чпин алакьунар, чпихъ авай чирвилер къалурна, ФГОС-дин вири цIийивилер кваз ачух тарсар гана. Инал заз чи райондин методкабинетдин методистриз рикIин сидкьидай чухсагъул лугьуз кIанзава. Абуру и мярекат абурлу хьун патал гзаф зегьмет чIугунвай.
Гьелбетда, муаллимдин пеше виридалайни важиблуди я. Алай вахтунда аялрин чирвилер артухаруниз еке фикир гузва. Анжах хайи чIалан тарсар гун патал конкурсдиз муаллимар тIимил къвезва. Вучиз лагьайтIа, акьалтзавай несилди хайи чIалаз яб гузмач, диде-буба аялдихъ галаз урус чIалалди рахазва. Эгер яргъалди и кар гьа икI амукьайтIа, чIал квахьда. ЧIал квахьайтIа, миллетни квахьда. Гьавиляй чна чи чIал хуьнин рекье вири къуватар эцигна кIанда.
ЧIал хуьх, адетар рикIелай алудмир, чIалан гуьрчегвал ачухара лугьуз кIанзава заз чи балайрин дидейриз. ГьакI хьайитIа, чавай чун халис чIалаз гьуьрмет ийизвай, чIал хуьзвай векилар я лугьуз жеда.
Чун, конкурсдин иштиракчияр, мукьувай сад-садахъ галаз таниш хьана, сада-садан гуьгьуьл кьуна, гьарда вичин чирвилер артухарна.
Жува и конкурсда 1-чка кьун зи рикIиз лап хуш кар хьана. Гила зи вилик еке макьсад ква: райондин тIвар вине хьун патал зун республикадин дережадани чка къазанмишиз алахъда. И кар кьилиз акъудун патал за еке зегьмет чIугвада.
Мадни заз зи арха тир вах Жаруллаева Магьиятаз рикIин сидкьидай чухсагъул лугьуз кIанзава. Ам анжах са зи даях туш, гьар са муаллимдиз куьмекчи ва меслятчи я. Ада еке зегьмет чIугвазва, районда ва республикада кьиле физвай конкурсра иштиракзава ва тайин чкаяр кьазва. Пешедал адан рикI ала, чIалан къадир ава. Гьавиляй адаз “ Россиядин Федерациядин лайихлу муаллим “ тIвар ганва. Къуй адахъ чандин сагъвал, генани еке агалкьунар хьурай!
Заз, жуван вири ватанэгьлийрихъ элкъвена, лугьуз кIанзава: чIал кIан хьухь, адан гуьрчегвал хуьх, ам гьамиша вине хьун патал жуван пай кутур, чIалаз вафалу хьухь!»
Эльза Эфендиева,
Ярагъ-Къазмайрин мектебдин
лезги чIаланни эдебиятдин муаллим
