Жегьилрин агалкьунар

Къенин девирдин школьникриз кIелу­нин, чирвилер къачунин рекье хъсан мумкинвилер, къулайвилер ава. КIанзавайди чирвилер къачудай ашкъи хьун, герек авачир крарал машгъул тахьун, гъиле авай багьа вахт бадгьавая акъуд тавун я. Чпин чирвилерал, агалкьунрал неинки муаллимривайни диде-бубайривай, гьакI вири халкьдивай дамах ийиз жедай жегьиларни чи мектебра тIимил авач. Ингье са чешне: Дербент райондин Белиж поселокда 2007-йисан 5-майдиз дидедиз хьайи Билал Артурович Римиханов. Заз жегьилдин  агалкьунрикайни чешнелувиликай куьрелди ихтилатиз кIанзава. 

Билала Белиждин 1-нумрадин гимназияда кIелна. Иллаки математикадин рекьяй тафаватлу чирвилер аваз кIелзавай Билал, 8-классдиз акъатайла, агалкьунралди имтигьанар вахкана, Махачкъалада кардик квай республикадин «Бажа­рагъ авай аялрин центр» лицейдик-ин­тернатдик экечIна. Гуьгъуьнлай образованидин и тешкилатдикай республикадин физикадинни математикадин лицей-интернат хьана.

«Гимназияда кIелай вахтунда мате­матикадин тарсар заз Фариза Максимо­внади гана. Гьа чIавалай и илимди­ зи фикир­ вичел желбна. Лицей-ин­тер­нетда­ни за ма­тематикани информатика дериндай чи­риз башламишна. Ина заз тарсар гайи Динара Равильевнадилайни Суайбат Сур­хаевнадилай за гзаф разивал ийиз­ва»­­, — лугьузва Билала.

Лицейда-интернатда кIелай вахтунда­ Билал Римиханова экономикадай жуь­ре­ба-жуьре олимпиадайрани агалкьунралди иштиракна.

Кьилди къачуртIа, РФ-дин Гьукуматдин патав гвай финансрин университетди 10-классда кIелзавайбурун арада кьиле тухвай Вирироссиядин школьникрин олимпиадада Билал Римиханова приз­дин чка кьуна, 11-классдиз акъатайла, и олимпиадада адакай гъалибчи хьана.

Региондин дережада кьиле фейи хейлин олимпиадайрани ада, 9-11-классра авайла, хъсан чкаяр ва гъалибвилер са шумудра къазанмишна. Экономикадай Россиядин школьникрин олимпиададин Казанда кьиле фейи эхиримжи паюнани Дагъустандин патай Билала иштиракна.

11-классда авайла, са шумуд олимпиадада гъалибвал къачуникди адаз уьл­кведин экономикадин машгьур вузрик имтигьанар галачиз экечIун патал кьезилвилер хьана.

Агалкьунри гьевес кутур жегьилди мад еке кукIушрихъ финин рекье алахъу­нар авуна. Хъсандиз гьазур хьайивиляй ада математикадай ЕГЭ 100 балл къачуналди вахкана, информатикадай — 98 балл.

Малум тирвал, ЕГЭ ви­ни дережадин баллар­ къа­занмишуналди­ вахкузвайбурун кьадар са акьван гзаф туш. Зи фикирдалди, ихьтин выпускникар кьетIенбур, гележегда чпикай чIехи пешекарар, алимар хкатдайбур, илимдин рекьяй вини кукIушрив агакьдай «куьлегар» гвайбур я. Гьелбетда, бажарагълу аялриз мадни вилик фин патал куьмек гунихъ, абурук гьевес кутунихъ еке метлеб ава. И кар республикадин кьиле авайбуруни фикирдай акъудзавач.

Къейд ийин, ЕГЭ-дин нетижада 100 балл къазанмишайбуруз, гьа жергедай яз Билал Римихановазни, алатай йисуз РД-дин Кьил Сергей Меликова 100 агъзур манат пул пишкешнай. Идалай гъейри, Билалав электроникадин туьквендин 20 агъзур манатдин сертификатни агакьна, 100 баллдин сагьиб тирвиляй адаз МФТИ-дин патайни 100 агъзур манат пул гана.

Государстводин имтигьанар агалкьунралди вахкунин нетижада 2024-йисуз Билал Москвадин физикадинни техникадин институтдик экечIна. Ада вуздани вич агалкьунралди кIелзавай, хъсан гележег авай жегьил тирди успатнава.

Гележегда илимдал машгъул хьун да­вамардай къаст авани лагьана хабар­ кьурла, Билала ихтилат давамарна: «Исятда, 1-курсунин студент яз, за вузда­ хъсандиз кIелунин, ам гзаф чирвилер къачуналди акьалтIарунин макьсад вилик эцигнава. Гележегда гьи рекьяй фидатIа, за гьелелиг жув патал тамамдиз тайинарнавач. Университетда ва я школада тарсар гунал машгъул хьунни мумкин я, гьа са вахтунда программированидизни итиж ийизва. Вахт атайла, и кьве рекьикай сад хкяда».

Къейд ийин, Билалан бубадин ватан Докъузпара райондин Къаракуьре хуьр я. Мадни еке агалкьунар хьурай жегьилдихъ!

К. Ферзалиев