Алукьнавай йисуз конкурсрик са бязи дегишвилер кутунва. ИкI, алай йисуз къуватда жеда: «Гь. Гьажибегован премия»; «М. Гьажиеван премия»; «Йисан месэла»; «Йисан мухбир»; «Гьевес кутадай премия» ва «ЦIийи тIварар».
2025-йисуз чи уьлкведа ЧIехи Гъалибвилин 80 йис тамам хьун къейдда. Идахъ галаз алакъалу яз, РФ-дин Президент Владимир Путина алукьнавайди Ватан хуьзвайбурун йис яз малумарнава.
«Дяведин махсус серенжемдин иштиракчийрин ва игитрин гьуьрметдай, гьакIни тарихдин гьар жуьре вахтара Ватан хуьнин рекье жуьрэтлувал къалурай чи бубайрин баркаллувал вини дережадиз акъудун яз, 2025-йис Ватан хуьзвайбурун йис яз малумарун теклифзава», — лагьана уьлкведин Президентди.
«Лезги газетдин» «Йисан месэла» конкурсни Ватан хуьзвайбурун, ватанпересвилин месэладихъ галаз алакъалу я. Пуд чкадикай ибарат тир и конкурсдин премийрин кьадар виликдай хьиз амукьда: 3000 манат; 2000 манат ва 1000 манат. Макъалайрин жанрайриз фикир гудач, кьилинди итижлу ва марагълу эсер кхьин я. Текстинин кьадар 4 чарчелай артух ва шииррин кьадар 5 бендинилай тIимил тахьун лазим я.
«Гьевес кутадай премия» — 1000 манат — газетдин чинал гьар жуьредин хци месэлайрай макъалаяр кхьизвайбуруз гузва. Жанрайрин тафаватлувал авач.
Редколлегиядин къарардалди 2025- йисалай «Йисан мухбир» конкурсдин премия 5000 манатдиз барабар жеда. И премиядалди «Лезги газетди» виридалайни активнидаказ кхьизвай, хци месэлаяр къарагъарзавай, абурал фикир желбзавай мухбиррин зегьмет къейдзава.
«ИкIни жеда кьван», «Хъсан шикил» ва «Литературадин эсеррин» конкурсар, иштиракчийрин кьадар эхиримжи йисара тIимил хьун себеб яз, къуватдай вегьедай къарар кьабулнава.
Гьа са вахтунда газетдин чинрал цIийи авторар желб авунин макьсаддалди «ЦIийи тIварар» премия — 3000 манат — малумардай къарар кьабулнава. Конкурсдин шартIари я яш, я жанраяр ва темаяр сергьятламишзавач, — анжах итижлу ва маналу макъалаяр хьурай. Буюр, кхьихь! Агалкьунар хьурай! Ракъурдай эсеррал абур гьи конкурсдиз талукь ятIа къалурун рикIелай алудмир.
Жасмина Саидова
