Эхь, гьуьрметлу юлдашар, Къацу Аждагьандин мусибатрин йис акъатзава, майдандиз Тарцин Къацу Гъуьлягъдин йис экъечI­зава. Аяндарри, политологри, астрологри адак хъсан умудар кутазва. Вири дуьньядин инсанриз кIанзавайдини гьам я. Секинвал, ислягьвал, хушбахтвал, бегьерлу зегьмет…

Къейд ийин хьи,  Аждагьандин йис хейлин халкьар, уьл­квеяр патал мусибатдинди хьана. США-дин, коллективный западдин яракьар агакьзавай Украинадин миллетбазри ислягьвилин теклифар инкарна ва дяве давамарна, агъзурралди инсанар тергдай чкадал гъана. Израилдин чапхунчивилин, инсафсузвилин сиясат себеб яз, Палестинадин, Ливандин, Иракдин, Сириядин, Ирандин хейлин шегьеррикай, хуьрерикай, имаратрикай харапIаяр авуна. ЦIуд агъзурралди агьалияр къирмишна. Азербайжандин ва Армениядин республикайри мад дяведин гьерекатриз рехъ ачухна. Африкадин са бязи уьлквейра террористрин бандайрин дестейри гужуналди гьукум кьадай алахъунар авуна. РагъакIидай патан къуватар Сербияда, Гуржистанда «хъипи инкъилабар» тешкилиз, гьукум чпин гъилибанрин гъиле тваз алахъна.

Ихьтин чIуру гьаларал тIебиат­дин бедбахтвилерни алава хъхьана. Яд акьалтунри, цIаяр кьуни, залзалаяр хьу­ни гзаф кIвалер чукIурна, кана, агъзурралди инсанар кIвалерикай магьрумна, живери, аязри кIевера туна.

Аждагьандин йис, гьелбетда, анжах бедбахтвилеринди тушир, ада инсанриз гзаф рекьерай виликди фидай мумкинвилерни яратмишна, са бязи уьлквеяр агалкьунрихъ тухвана…

Гъуьлягъдин кьетIенвилер 

Малум тирвал, РагъэкъечIдай патан гороскопда зодиакдин 12 гьайвандин лишанар ава. Абуру нубатдалди сада-сад эвеззава. 2024-йис Аждагьандин йис тир. Гила чун Гъуьлягъдин йисаз гьахьзава. Китайдин гороскопдин къанунралди, ЦIийи йис 1-январдиз ваъ, 29 январдиз алукьзава ва ам 2026-йисан 16-февралдалди давам жеда. ИкI ятIани, бязи астрологри гьисабзавайвал, 1-январдиз ЦIийи йис къаршиламишунихъ вичин хийир­лу метлебарни ава. Мисал яз, Гъуьлягъдин йисак умуд кутуна, гьикьван фад цIийи йис къаршиламишиз гьазурвилер акур­тIа, гьа ксар патал йис пара бегьерлуди жеда.

Чаз чизвайвал, гъуьлягъ къайи, зегьле ракъурдай гьайван я. Акун гьич, гьатта адан тIвар кьурла, инсанрик зурзун акатзава. ИкI ятIани, Китайдин гороскопда ам гзаф акьуллу, кьатIунар авай, амалдар  затI яз гьисабзава. Ихьтин ерийриз килигна, гъуьлягъ уьмуьрда жезвай дегишвилерив, цIийивилерив фад ва регьятдиз вердиш жезва.

Рекъемрин куьмекдалди психоанализ ийидай пешекар Ольга Шипилоди лугьузвайвал, «гъуьлягъ хьиз явашдиз, мукъаятвилелди, гьар са юзуниз фикир гуз, фин патал са шумуд камунин вилик амаз фагьумдай, ахтармишдай, къарар кьабулдай алакьунар герек я. Гьавиляй 2025-йисуз, гележег фикирдаваз, бегьерлу планар яна кIанда».

РагъэкъечIдай патан уьлквейра, адет яз, гъуьлягъ ислягь, секин гьайвандай кьазва. КIвалин, гьаятдин къваларивай гъуьлягъ акун, гьатун рикIик квай кIвалах туькIуьнин, хъсан кардин лишан яз гьисабзава. Амма ихьтин фикирдихъ галаз рази хьун жув патал зиян я. Хаталувал гьиссайла, гъуьлягъди гьужумни ийида, вичин зегьерни худда твада­.

Гъуьлягъдин йис сад хьтиндини жедач, амма и йисуз фагьумдихъ, акьулдихъ, зигьиндихъ, аналитикадихъ галаз алакъалу пешекаррин (алимар, философар, арифдарар) крар вилик фида. Гъуьлягъ тади квачир, галчIур жез, явашдиз фидайди я, амма бязи вахтара ада виликди яргъаз хкадарни ийида. Гъуьлягъдин гьерекатрал амал ая, куьн  хъсан крари, агалкьунри гуьзлемишда. И йисуз­ садакни­ ­тади акатна виже къведач, гъиле кьазвай гьар са кар фагьумна, иридра алцумна, садра атIудайвал тамамарна кIанда.

Гъуьлягъдин алакьунрикай сад хамуникай азад хьун (хъуьр гадарун) я. Гьавиляй и йисуз дегишвилер,  цIийи­ви­лер гзаф хьунухь мумкин я. Инсанар абур кьабулиз гьазур хьана кIанда.  Гъуьлягъдиз къастуналди вичин мураддихъ фин хас я. Анжах — тади квачиз. Ихьтин ерияр инсанризни агалкьунар къазанмишунин карда герек къведа. Астрологри лугьузвайвал, гьар са югъ, вилик квай крар фикирдаваз, вахтунин гьалариз къимет гуз, зигьиндихъ яб акализ, башламишна кIанда. Инсандихъ виликамаз тайинарнавай, кар вилик тухудай планар хьун хъсан я. Гьа вахтунда гъиле кьазвай гьар са кардихъ агалкьунни жеда, мурадни кьилиз акъатда.

Йис гьикI ­къаршиламишда?

Адет хьанвайвал, инсанри ЦIийи йис гьикI къарши­ламишайтIа, ам гьакI финни ийида лугьуда. Гьавиляй герек гьазурвилер аквада, суфраяр ЦIийи йисан истемишунрихъ галаз кьадайвал гьазурда. И жигьетдай  Гъуьлягъдин йис гьихьтинди я? ЦIийи йис гьикI къаршиламишун лазим я? Гъуьлягъдиз хъел текъведайвал, ам жуван патал гъидайвал. Са гафуналди, Цийи йис тайин адетар вилив хвена къаршиламишун чарасуз я.

Малум тирвал, гъуьлягъ рикIе авайди чуьнуьхдай, еке компанияр, гзаф инсанар авай ван-сес такIан затI я. Гьавиляй ЦIийи йис секин, гзаф инсанар, ван-сес авачир чкада, багърийрихъ галаз, лап мукьва дустарин юкьва къаршиламишун меслятзава.

ЦIийи йис къаршиламишзавай чка чIагурзавай гьалдизни фикир гун хъсан я. Гъуьлягъдиз тIебиатдихъ галаз алакъалу вири шейэр кIанда. И кар фикирда кьуна, кIвал суварин къайдада безетмишдайла, иер къванерикай, тарарин хелерикай, цуькверикай менфят къачуз жеда.

ЦIийи йис къаршиламишдайла, иер (стильный) парталар алукIун хъсан яз гьисабзава. Гьа са вахтунда парчаяр, шейэр­ гъуьлягъдин хъуьрдиз (хамуниз) ухшар авай­бур хьайитIа мадни хъсан я. Мисал яз, пайетки, стразар, къизилдин, гимишдин безекар…

Гъуьлягъ аламатдин, гуьрчег ва сирлу гьайван я. Гьавиляй гьар сада алукIзавай парталдизни ихьтин ерияр хас хьун герек я. Рангарикай рахайтIа, гъуьлягъдиз гзафни-гзаф вили, аби, къацу рангар мукьва ва хуш я. Яру ранг агалкьунрин лишан ятIани, ам гъуьлягъдихъ галаз кьадач. Яру рангунин партал алукIун дуьз жедач. Чан алай тIебиатда гьалт тийизвай рангарин костюмар, булушкаяр алукIунни меслятзавач.

КIвал суварин дунда аваз чIагурдайлани, винидихъ къейднавай рангарин парчайрикай, шейэрикай менфят къачуртIа, хъсан я. Елкадални жуьреба-жуьре безекар алу­кIайтIа жеда.

ЦIийи йисан суфра патал гзаф шейэр ваъ, анжах еридин, тIямлу, менфятлу суьрсетар хкягъун лазим я. Им суфрадихъ жедай инсанрин, кIвал безетмишзавай шейэрин, тешкилзавай къугъунрин кьадардизни талукь я.

Кайванийрин фикирдиз

Са рахунни алач, хизандин суфра чIа­гур­­завайди кайванияр, дишегьлияр я. ЦIийи йисан суфра дуьзмишиз кIевера гьат тавун патал абуруз ихьтин меслятар гуз жеда.

Гзафбуру фикирзавайвал, гъуьлягъди набататар, ве­кьер-кьалар незва. Им ягъалмишвал я. Ам йиртижи, яни як, иллаки­ къуьрен як, недай гьайванрикни акатзава. Гьавиляй ЦIийи йисан суфрадин кьили­н хуьрек  якIукай гьазурнавайди хьана кIанда. ЖагъайтIа, — къуьрен, кIвалин къуьрен якIу­кай. Суфрадал вечрен, малдин, лапаг­дин якIун, балугъдин хуьрекар, какаяр хьайи­тIани хата авач.

Къейд авун лазим я хьи, гъуьлягъ незвай шейэрин еридивни мукьуфдивди эгечI­завай гьайванрикай я. Гьавиляй суварин суфра патал шейэр къачудайла, абурун тазавилиз, еридиз гзаф фикир це. Ужуз, вахт алатнавай шейэриз гъил яргъи ийимир. ТIимилни хьуй, анжах еридин суьрсет хьуй.

Адет яз, ЦIийи йисуз чна сада-садаз савкьатарни гузва. Гъуьлягъ ихьтин кардиз акси туш. Анжах, пишкешар хкядайла фикир гана кIанзавай месэлаяр ава. Савкьат касдивай ишлемишиз жедайди хьун лазим я. Мисал яз, хуьрекдин къапар, яшайишдин техника, музыкадин алат… Пул тунвай конвертни лап хъсан пишкеш я. Ида касдиз вичиз кIани затI маса къачудай мумкинвал гуда.

Косметикадикай, парфюмериядикай ра­хай­тIа, и шейэр­ талукь касдиз чарасуз лазим аватIа, пишкешна кIанда. Жуьреба-жуьре безекар лап хъсан савкьатриз элкъведа. Чи дишегьлийриз иллаки тупIалар, кулонар, цамар, камарияр, итимриз запонкаяр хуш жеда. Алукьзавай йисаз гьуьр­мет авунин лишан яз, гъуьлягъдиз ухшар авай пишкеш хкягъайтIа, мадни хъсан я.

Гъуьлягъдин патай ­галайвилер

Алукьзавай йисуз жуван чирвилер хкажуниз гзаф фикир гана кIанзава. Гьавиляй багъридиз, дустуниз, чирхчирдиз вичин карда агалкьунар къазанмишун патал образованидин курсар, программаяр пишкешайтIа, пис жедач.

Акьуллу Гъуьлягъ вичин кар уьмуьрдивай вуч кIанзаватIа чидай инсанрив гьуьрметдивди эгечIзавайди я. Кьуру тарифар, еке гафар гвайбурун терефдар ам туш. Гьавиляй, 2025-йисан мурад тIалабдайла, кьилиз акъудиз алакьдай крарикай фикир ая.

Гъуьлягъдин йисуз хайи инсанар гзаф акьуллубур ва сирлубур жеда. Чпиз ганвай бажарагъдиз, алакьунриз килигна, абурукай философар, богословар, политикар ва финансистар хьун мумкин я. Гъуьлягъ-инсан хъсандиз яшамиш жез кIандай, ктабрал, музыкадал, гуьрчег парталрал рикI алай, тIямлу хуьрекар кIандай кас я.

Гъуьлягъ-инсанар чеб-чпихъ, чпин алакьунрихъ инанмишбур я. Абуру, маса касдин фикирдихъ яб акална, чеб секинсуз ийидач. Гзаф вахтара абуру, кьил атIумна, чарада гузвай меслятни кваз такьуна, чеб кIеве твада.

Гъуьлягъдин йисуз хайи инсанрихъ чпин къвалав вафалу дустар кIватIдай алакьунни ава. Амма абуруз са куьлуь-шуьлуьдикай гьасятда хъелни къведа. Гьа са вахтунда абуру жуьреба-жуьре хилериз итиж ийида. ДатIана са вуч ятIани чириз, кIелиз алахъда. Ахтармишунардай кIвалахра абурухъ хъсан нетижа­яр жеда. И ерияр себеб яз, абурукай хкянавай кеспидин хъсан устадар жезва. Абурун рикIел гзаф крар аламукьда. Хизандиз, дустариз абуру вафалувал къалурда.

Гьар са касди алукьзавай йис вич патал вири терефрихъай секинди, кутугайди, хъсанди, агалкьун­ринди хьун патал мурад тIа­лаб­за­вайди я. ЦIийи йисалай эгечI­на, кIвализ берекат атун патал дакIардал са къапуна аваз нек эцига. Гъуьлягъдиз ихьтин пишкеш пара хуш жеда.

Меслятзавайвал, алатай йисан дердияр, татугайвилер гваз, буржар алаз ЦIийи йисаз гьахьна виже къведач. Буржар вири вахкун герек я. Багърийрихъ, мукьва-кьилийрихъ галаз къалмакъал тахьун патал алахъна кIанда.

Гъуьлягъ виликди финин, хушбахтвилин, агалкьунрин яржни я лугьуда. 2025-йисуз гзаф инсанриз чпин мурадар­ кьилиз акъуддай мумкинвал жеда. Дуьньяда, уьмуьрда хъсан патахъ хейлин дегишвилер арадал къведа. Иллаки инновацийрихъ, тIебии тушир акьулдихъ галаз алакъалу экономикадин хилер виликди фида. Гъуьлягъдин зигьинди, акьулди уьлквейрин сиясатдин регьберриз, международный алакъайриз талукь месэлаяр гьялдайла, вири тере­фар­­, уламар алцумна, къарарар кьабулиз куьмекда.

Лап дегь девиррилай чизвайвал, гъуьлягъ девлетар, хазинаяр хуьзвай гьайванни я. Гьавиляй зегьметдалди къазанмишзавай девлет вара-зара ийидай амалризни рехъ гумир.

Санлай къачурла, Къацу Гъуьлягъдин йис вири алем патал кутугайди жедалда. Къуй гьакI хьурай! Дявеяр акьалтIрай! Инсанри ислягь, ачух вили цавун кIаник азаддиз нефес къачурай, Аллагь-Таалади ганвай уьмуьрдал шадвал авурай, хъсан, къени крар артухаррай!

Нариман Ибрагьимов