Хуьрерин къурулушар вилик тухуниз ва рекьерни куьчеяр дуьзмишуниз эхиримжи йисара СтIал Сулейманан районда кьилин фикир гузва. Нетижа яз, хуьрер гуьрчег, рекьерни куьчеяр къулайбур ва хатасузбур жезва.
Мукьвара райондин рекьерин фондунин такьатрин гьисабдай Испикрин хуьре Дагъустандин халкьдин шаир СтIал Сулейманан тIварунихъ галай куьчеда къир цана. И куьчедин яргъивал 300 метрдилай виниз я. Ам, лугьудайвал, «кIвачик квайди» я.
— Эхиримжи вахтара, райондин амай гзаф хуьрер хьиз, чи Испикрин хуьрни чIехи, гуьрчег ва авадан жезва, — лугьузва зегьметдин ветеран, саки 50 йисуз школада муаллимвиле кIвалахзавай Фикрет Агьмедова. — Идай чна муниципалитетдин кьил Саид Мусинович Темирхановаз ва талукь маса къуллугъриз чухсагъул лугьузва.
АСП-дин кьилин заместитель Руслан Магьмудова чаз лагьайвал, хуьруьн амай куьчейрани къир цунин, дуьзмишунин кIвалахар тухун давамарда. Сифте нубатда — дяведин махсус серенжемдин иштиракчияр ва абурун хизанар яшамиш жезвай куьчейра.
Хазран Кьасумов
